.png)
Autoriteti i Dosjeve i ka përsëritur Kuvendit kërkesën për ndryshimin e ligjit, me argumentimin se në formën aktuale, ky ligj mbron zyrtarët e lartë që mund të kenë bashkëpunuar me Sigurimin e Shtetit.
Por, më shumë vëmendjen tërheq në deklaratën e Autoritetit sjellja e një shembulli të një politikani të lartë me inicialet I.M., për të cilin Autoriteti thotë se verifikoi dosjet e klasifikuara të Sigurimit të Shtetit dhe që nga mediat po përflitet se është ish-Presidenti Ilir Meta.
“Autoriteti është ndeshur me informacione dhe të dhëna mbi një personazh me profil të lartë politik. Institucionit iu kërkua nëpërmjet postës elektronike që të verifikohej figura e shtetasit I. M. në dosje të klasifikuara të ish-Sigurimit të Shtetit. Konstatimi u shqyrtua me përgjegjësi dhe materialet u bënë të njohura për të gjithë anëtarët e zgjedhur”, thotë Autoriteti i Dosjeve në deklaratën e bërë.
Autoriteti i referohet një klauzole të ligjit që pengon kontrollin e hollësishëm të dosjeve dhe mbrojtjen e shumë politikanëve të lartë që kanë qenë pjesë e strukturave bashkëpunuese me Sigurimin e Shtetit.
Klauzola e ligjit që kërkon të mos rishkruhen apo riplotësohen certifikata të lëshuara nga Komisioni Bezhani. Komisioni Bezhani njihet kështu për shkak të mbiemrit të kryekomisionerit Nazif Bezhani, i cili drejtoi këtë Komisioni prej vitit 1997, deri në vitin 2000 dhe pajisi me certifikata shumë politikanë që aktivë, ose jo sot.
Por, Ilir Meta e cilësoi lojë të patronazhistëve dhe sajesë përmes një deklarate të Tedi Blushit, ish-zëdhënësi i tij në Presidencë që i është bashkuar te Partia e Lirisë.
“Lat nam me patronazhistët e sotëm ju që paskeni hallin e patronazhistëve të komunizmit. I bëjmë thirrje Autoritetit të Dosjeve që të hapë që sot dhe të bëjë publike çdo dosje dhe informacion përfshirë edhe procesverbalet e Organizatës së Rinisë të asaj kohe”, shkruan Blushi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje