.png)
Bajern Mynih ka shitur më shumë se 100.000 maska me ngjyrat dhe logon e tij për 24 orë, siç bën me dije vetë klubi bavarez në faqen e tij zyrtare. Një sukses i jashtëzakonshëm dhe deri diku i papritur. Bajerni, në fakt, u ka kërkuar tifozëve të vet mirëkuptim, duke qenë se për shkak të numrit të lartë të porosive, koha e shpërndarjes do të jetë disi e gjatë.
Të ardhurat nga shitja e maskave do të shkojnë për një platformë donacionesh të krijuar nga dy futbollistët e Bajernit, Xhoshua Kimish dhe Leon Gorecka, të cilët mbështesin institucionet e bamirësisë që janë përfshirë në luftën ndaj koronavirusit. Që prej së dielës, në Bavari është e detyrueshme që të mbahen maskat në transportin publik dhe në dyqane.
“Me këtë nismë duam të tregojmë se FC Bajern bën gjithçka për të qenë një model i disiplinës në luftën kundër koronavirusit, pas apelit për këtë çështje nga kryeministri bavarez, Markus Sëder”, – ha deklaruar presidenti i këshillit administrativ të klubit të madh gjerman, Karl-Hajnc Rumenige. “Në të njëjtën kohë, – vazhdon ai, – jemi krenarë të japim një kontribut për iniciativën e Kimish dhe Gorecka”.
Maskat janë realizuar me shallet që Bajerni kishte planifikuar të shpërndante në “Allianz Arena” gjatë ndeshjes së kthimit në Ligën e Kampionëve ndaj Çelsit, me rastin e 120-vjetorit të krijimit të klubit. Maskat për fëmijë kushtojnë 5.95 euro, kurse ato për të rritur 6.95 euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje