.png)
Nga njëri kampion bote te tjetri. Bajerni i Mynihut ka bërë zyrtarisht edhe blerjen e dytë për sezonin e ri. Pas Benzhamin Pavard, klubi i madh gjerman ka arritur marrëveshjen edhe me francezin tjetër, Lukas Hernandez. Të dy janë mbrojtës dhe në Botërorin e Rusisë ishin titullarët e Francës në krahët e prapavijës.
Një goditje e rëndësishme e Bajernit, që me anë të faqes zyrtare ka bërë të ditur blerjen e Lukas Hernandez nga Atletiko e Madridit. Ajo që bie në sy ka të bëjë me faktin se për këtë futbollist klubi gjerman ka shpenzuar 80 milionë euro për blerjen e kartonit nga Atletiko. Një rekord sa i takon blerjes së një mbrojtësi në kampionatin gjerman, ku këto shifra janë të pazakonta. Mbrojtësi francez i krahut të majtë ka firmosur një kontratë 5-vjeçare me Bajernin, që sistemon kështu krahët me dy kampionë bote, duke nisur revolucionin e paralajmëruar nga presidenti Uli Hënes.
Në komunikatën zyrtare të Bajernin përmendet edhe një dëmtim që është vënë re gjatë vizitave mjekësore të Hernandez. Bëhet fjalë për një problem në ligamentin e këmbës së djathtë dhe pas konsultave me drejtuesit e Atletikos, është vendosur që Hernandez të operohej menjëherë. Francezi do të jetë i gatshëm për bavarezët që në fillim të sezonit të ardhshëm. Me ardhjen e Pavard, i blerë nga Shtutgarti për 35 milionë euro, dhe tani të Hernandez, Bajerni ndryshon repartin e mbrojtjes. Sipas asaj që ka thënë Hënes, nga klubi bavarez pritet të largohen mbrojtësit Rafinja, Boateng dhe Humels.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje