.png)
Sekretari i Përgjithshëm i PD-së, Gazment Bardhi sjell një shembull se pse vettingu në politikë është i rëndësishëm.
Duke ripublikuar grafikun e udhëtimeve të Damian Gjiknurit në kohën kur ishte ministër, që sipas Bardhit, 15 herë ka dalë jashtë Shqipërie me pronarët e inceneratorëve, numri 2 i PD-së shkruan se drejtësia duhet të fillojë hetimet
“Afera 400 milionë euroshe e mafies së plehrave është një nga shpërdorimet më të mëdha të taksave të qytetarëve shqiptarë.
Ditën e djeshme ( e enjte) Partia Demokratike zbuloi një tjetër zgjatim të kësaj afere të pisët, nëpërmjet faktimit të lidhjeve të ngushta të Mirel Mërtirit dhe Klodian Zotos, bosëve të inceneratorëve, dhe Damian Gjiknurit, i cili ka udhëtuar mbi 15 herë me ta jashtë Shqipërisë, ndërkohë që i gjithë aparati shtetëror ishte vendosur në gatishmëri të mafies së plehrave.
Ky konflikt i pastër interesi i shtohet numrit të madh të provave që Partia Demokratike ka grumbulluar vitet e fundit mbi këtë aferë që bën bashkë drejtuesit më të lartë të këtij pushteti të korruptuar, e sigurisht vet Edi Ramën, që ka promovuar dhe mbrojtur këto projekte që shkrumbojnë vetëm taksat e qytetarëve.
Tani është radha e drejtësisë të thotë fjalën e saj mbi këtë aferë 400 milionshe, që tregon edhe njëherë urgjencën që ka Shqipëria të pastrohet nga politikanët e korruptuar dhe të largoi këtë regjim plaçkitësish”, shkruan Bardhi.
Gjiknuri: Padi për shpifje. Luli dhe Gaztori i tij kanë nxjerrë PD në shitje
Pas kësaj deklarata te Sekretarit të Përgjithshëm të PD ka reaguar homologu i tij socialist, që ka paralajmëruar paditjen për shpifje.
“Efektin ndotës të të tillë Gazrave nuk ka incinerator, as impiant që ta marrë përsipër ta trajtojë. Për të gjitha deklarimet e djeshme, të përsëritura dhe ditën e sotme kam autorizuar dorëzimin e padisë për shpifje ndaj Gazit të Lulit”, deklaron Gjiknuri.
Sekretari i Përgjithshëm i PS-së thotë se nga verifikimet që ka kryer personalisht në sistemin TIMS, nga 17 datat e pretenduara nga PD se ka lëvizur me bosët e incineratorëve, 14 i kanë rezultur të pavërteta dhe tre të tjera rastësore.
“Për hir të transparencës ndaj opinionit publik, ju drejtova zyrtarisht autoriteteve përgjegjëse dhe nga 17 datat e pretenduara nga PD si lëvizje të miat jashtë vendit, sipas sistemit TIMS 14 rezultojnë të pavërteta. Tre data që përkojnë me udhëtime të miat janë krejt rastësore e pa asnjë lidhje me personat në fjale: përkatësisht dy janë vizita zyrtare në detyrën e ministrit dhe një udhëtim me automjet me familjen time”, shkruan ai.
Gjiknuri mohon se ka udhëtuar me charter, siç akuzon PD dhe i lidh akuzat e opozitës ndaj tij me “Foltoren” e Berishës, duke e nxjerrë partinë në shitje.
“Nën presionin e “Foltores”, duket qartë se Gazi i Lulit dhe Luli i Gazit e kanë nxjerrë në shitje partinë si shpifësa me pagesë, gjobvënësa ekonomikë e politikë, duke ju vetëofruar blerësit më të parë. Gaztori i Lulit të gjejë avokatin dhe bëjë gati mbrojtjen në gjykatë! Siç e sfidova dje publikisht në Kuvend, hapi i dytë, të bëjë gati heqjen dorë nga mandati si shenjë reflektimi për budallëqet me pagesë që nxjerr nga goja!”, mbyll reagimin e tij Sekretari i Përgjithshëm i PS-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje