Basha dhe Tabaku, të munguarit e çeljes së fushatës nga Alibeaj, por me një ndryshim

Kryetari i komanduar i PD-së, Enkelejd Alibeaj çeli fushatën të martën ku ra në sy mungesa e ish-kryetarit Lulzim Basha dhe ish-nënkryetares Jorida Tabaku.

Kjo e fundit nuk e përcolli aktivitetin as në faqen e saj në Facebook, ndryshe nga Lulzim Basha.

Ish-kryetari i PD-së kishte lajmëruar më herët  në një përgjigje për mediat se do të ishte i pranishëm në fushatën e 14 majit. I pyetur sërish nga media se në cilën zonë, ai dha një përgjigje të sforcuar dhe aty për aty: Në gjithë Shqipërinë.

Deri më tani Lulzim Basha nuk është parë në asnjë prej aktiviteteve të Enkelejd Alibeajt apo atyre pak kandidateve që janë zyrtarizuar nga PD-ja.

E vetmja ‘lëvizje’ e Lulzim Bashës është ndryshimi i coverit të faqes së tij në Facebook duke kërkuar që të votohet për numrin 9 në fletën e votimit që përkon me logon e Partisë Demokratike. Megjithatë nën zë thuhet se marrëdhëniet e Lulzim Bashës dhe Jorida Tabakut më Enkelejd Alibeajn janë të ndryshme. Basha po planifikon të rikthehet pas zgjedhjeve, ndërsa  mungesa e Jorida Tabakut duket se ka lidhje me disa qejfmbetje brenda radhëve, përfshi edhe pozicionin e saj elektoral në njësinë nr 8 për Roland Bejkon.

Ka disa ditë që Tabaku nuk është shfaqur ndjeshëm përvecse për nismat e saj ligjore në Kuvend që kane qenë individuale. Ajo nuk ishte e pranishme në takimin e Enkelejd Alibeajt me të dërguarin e SHBA-së, Gabriel Escobar, ka munguar gjithashtu në prezantimin zyrtar të Roland Bejkos dhe nuk e bëri këtë gjë as të martën ku Bejko ishte figura qendrore e këtyre zgjedhjeve për Enkelejd Alibeajn dhe partine që drejton.