.png)
Kryetari i opozitës, Lulzim Basha, mbledh të enjten kryesinë e Partisë Demokratike për t’i dhënë udhë fillimit të proçesit për përzgjedhjen e kandidaturave për deputetë dhe kryetarë bashkie.
Kryesia do të miratojë udhëzimin me rregullat e përzgjedhjes së emrave dhe gjithçka më pas do të transferohet në bazë.
Ndryshe nga çdo vit tjetër, procesi në nivel dege për evidentimin dhe përzgjedhjen e kandidaturave do të bëhet përmes parimit “një anëtar një votë” dhe disa rregullave të caktuara që PD-ja i ka kooptuar qysh para një viti pas një diskutimi me Institutin Ndërkombëtar Republikan (IRI), pranë Partisë Republikane të SHBA dhe Partinë Konservatore Britanike e Fondacionit Uestminster për Demokracinë.
Për këtë proces foli edhe Lulzim Basha.
“Nesër (të enjten) kryesia e Partisë Demokratike do të marrë një vendim të rëndësishëm për shoqërinë dhe politikën shqiptare për mënyrën e përzgjedhjes së kandidatëve, në ushtrimin më të madh demokratik që ndonjë parti politike ka bërë ndonjëherë në Shqipëri.
Me mbështetjen dhe ndihmën e vyer të Institutit Ndërkombëtar Republikan (IRI), pranë Partisë Republikane të SHBA dhe të Partisë Konservatore Britanike e Fondacionit Uestminster për Demokracinë kemi garantuar parimet dhe rregullat për përfshirjen e drejtpërdrejtë të anëtarësisë në propozimin dhe përzgjedhjen e kandidatëve”, shkruan Basha në Facebook.
“Një ditë përpara këtij vendimi të rëndësishëm, pata kënaqësinë të falenderoj gjatë një videokonference z. David Jones, Drejtuesin e Panelit Parlamentar për Vlerësimin e Kandidatëve në Partinë Konservatore Britanike dhe z. Thibault Muzergues, Drejtor i Programit për Europën në Institutin Ndërkombëtar Republikan për ndihmën e çmuar që na kanë dhënë në këtë rrugëtim sfidues.
Miqtë tanë ndanë me mua sot besimin se modeli që do të miratojmë nesër në kryesinë e Partisë Demokratike, do të kontribojë për demokratizimin e jetës politike dhe duhet të jetë shembull edhe për partitë e tjera në vend.
Ky është një hap i rëndësishëm për demokracinë tonë. Natyrisht gara e vërtetë për demokratët dhe opozitën nis pas këtij procesi për t’i dhënë Shqipërisë një qeveri që punon për njerëzit, dhe jo për vete”, nënvizon Basha.
Krahas udhëzimit, kryesia e partisë do të miratojë edhe listën me 12 koordinatorë që do të mbikqyrin punën në terren.
Etapat e procesit
Procesi në nivel dege për evidentimin dhe përzgjedhjen e kandidaturave do të realizohet në periudhën 25 qershor – 31 korrik.
Brenda datës 1 gusht pritet të ngrihet Komisioni i Vlerësimit të Kandidatëve, ndërsa procesi i seleksionimit të kandidaturave do të realizohet brenda gushtit.
Procesi i konsultimit të kandidatëve do të vijojë më pas në muajin shtator.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje