.png)
Duke filluar nga kjo e premte Bashkimi Europian do të njohë në bllok certifikatat digjitale të vaksinimit për shtetasit e Maqedonisë së Veriut, Turqisë dhe Ukrainës.
Komisioni Europian miratoi ditën e enjte vendimin për njohjen e certifikatave të lëshuara nga këto vende. Kjo do të thotë se certifikatat e sigurisë së Covid të lëshuara nga Maqedonia e Veriut, Turqia dhe Ukraina, që do të lidhen me sistemin e BE-së, do të njihen në të gjithë hapësirën e unionit.
Në të njëjtën kohë, edhe Turqia, Ukraina dhe Maqedonia e Veriut do të njohin certifikatat e sigurisë të lëshuara nga 27 vendet anëtare të Bashkimit Europian. Komisioni thotë se pjesëmarrja në sistemin e sigurisë së lëshimit të këtyre certifikatave do të lehtësojë lëvizjen e qytetarëve të të dyja palëve.
Megjithatë, për shtetasve turq, ukrainas dhe maqedonas BE do të njohë në bllok vetëm certifikatat e sigurisë për personat e vaksinuar me një nga vaksinat e miratuara nga Agjencia Europiane e Barnave (EMA), që janë AstraZeneca, Pfizer dhe Johnson&Johnson.
Për certifikatat e sigurisë të vaksinave të tjera, si kinezja Sinovac dhe rusja Sputnik V, Komisioni u lë dorë të lirë vetë vendeve anëtare që të vendosin për njohjen ose jo të tyre. Me këtë vendim të Komisionit, Turqia, Maqedonia e Veriut dhe Ukraina u bashkohen vendeve të treta joanëtare të BE, si Islanda, Lihtenshtejni, Norvegjia, San Marino, Zvicra dhe Vatikani.
Certifikata digjitale e Covid detyron të gjitha vendet anëtare të BE që ta njohin atë, duke ndihmuar në lehtësimin e kufizimeve për mbajtjësit e tyre. Gjatë udhëtimit, mbajtësi i kësaj certifikate parimisht duhet që të përjashtohet nga kufizimet e lëvizjes së lirë.
Certifikatave e sigurisë u jepet personave të vaksinuar plotësisht, atyre që rezultojnë negativ në një testim të kryer në 72 orët e fundit, apo që e kanë kaluar Covid. Dokumenti i lëshuar në formë digjitale duhet të përmbajë një kod skanimi, që të adresojë automatikisht autoritetet e BE gjatë kontrolleve të mundshme në faqen zyrtare të institucioneve të vendeve që e kanë lëshuar.
Ndërkohë, Shqipëria lëshon certifikata sigurie vetëm për personat e vaksinuar, por që ka hasur probleme në kodin e skanimit dhe lidhjes së tij me e-Albania. Certifikatat e lëshuara nga Shqipëria nuk njihen në bllok nga BE, por një pjesë e vendeve, si Greqia dhe Hungaria i njohin si vendime individuale të tyre. Këto vende njohin edhe vaksinën Sinovac e Sputnik.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje