.png)
Gazeta Si – Presidenti amerikan Joe Biden ka njoftuar se Karine Jean-Pierre do të jetë zëdhënësja e re e Shtëpisë së Bardhë në vend të Jen Psaki, e cila do të largohet nga posti i saj më 13 maj.
Jean-Pierre është aktualisht zëvendësja e zëdhënëses aktuale. Ajo është gruaja e parë afrikano-amerikane që do të mbajë këtë detyrë.
“Karine, jo vetëm që ka përvojën, talentin dhe integritetin e nevojshëm për këtë punë të vështirë, por ajo do të vazhdojë të udhëheqë rrugën në komunikimin e punës së administratës Biden-Harris në emër të popullit amerikan. Unë dhe Jill e kemi njohur dhe respektuar Karine për një kohë të gjatë dhe ajo do të jetë një zë i fortë që do të flasë për mua dhe këtë administratë”, tha presidenti Biden, duke falënderuar Psakin për shërbimin e saj ndaj vendit.
Karine Jean-Pierre, e lindur në Martinikë dhe e rritur në Nju Jork, është e diplomuar në Universitetin e Kolumbias dhe është këshilltare për një kohë të gjatë e presidentit Biden.
Ajo ka mbajtur role të larta politike dhe komunikimi në administratën e Bidenit, në fushatën zgjedhore të tij dhe më pas si zv/president në administratën e Obamës.
Para rolit të saj në fushatë, ajo ishte Shefe e Marrëdhënieve Publike për MoveOn.org dhe analiste politike për NBC dhe MSNBC.
Jean-Pierre ishte gjithashtu drejtore e Zyrës së Çështjeve Politike të Shtëpisë së Bardhë gjatë administratës Obama-Biden dhe zëvendësdrejtore e fushatës së rizgjedhjes së presidentit Obama 2012.
Më parë, ajo ka punuar në Qendrën për Etikën Komunitare dhe Korporative, duke i shtyrë kompanitë e mëdha të ndryshojnë praktikat e tyre të biznesit dhe është një autore studimesh.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje