.png)
Nga ora 09:00 e paradites së të premtes, kanë rifilluar fluturime e para nga Rinasi, me avionin e parë Tiranë-Bolonja ndërkohë kanë mbërritur avionët nga Mynihu dhe Brukseli.
Duket se aeroporti pas më shumë se 48 orësh i është kthyer normalitetit pas bllokimit të trafikut ajror nga greva e kontrollorëve të Albcontrol.
Ministrja e Infrastrukturës dhe Energjisë, Belinda Balluku, përmes një postimi në rrjetin social Facebook, njoftoi se sot në orën 09:00 shënohet dhe fundi i krizës së bllokimit të punës nga greva e kontrollorëve të AlbControl
“Duke filluar nga ora 09:00 e ditës së sotme, operimet në aeroportin e Rinasit dhe në hapësirën ajrore shqiptare kthehen në normalitet“, ka shkruar Balluku.
Mëngjesin e së mërkurës u bllokuan fluturimet në aeroportin e Rinasit, ndërkohë që dje pasdite rifilluan ato esenciale që përfshijnë fluturimet humanitare, diplomatike, ushtarake dhe shëndetësore.
Kriza në aeroportin e Rinasit u zgjidh duke sjellë disa kontrollorë turq dhe grekë të trafikut ajror, të cilët do të zëvendësojnë kontrollorët shqiptarë që pezulluan punën.
Kjo bëri që në Rinas të ulej avioni i parë i “Air Albania”, i cili transportoi një sasi vaksinash kineze.
Mësohet se kontrollorët e huaj kanë mbërritur mbrëmjen e së mërkurës në Rinas, duke ardhur nga Podgorica.
Por gjatë ditës së djeshme Ministria e Transportit nisi negociata me disa vende të Bashkimit Europian për zëvendësimin e kontrollorëve të trafikut ajror në Shqipëri, të cilët kanë braktisur punën.
Deri tani, janë arrestuar tre kontrollorë të trafikut ajror, kreu i sindikatës, Armando Fezga, Flora Ndreca, përgjegjëse e turnit dhe Muhin Mezini, të cilët akuzohen për shpërdorim detyre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje