.png)
Gazeta Si – Dita e njëzet e tretë e luftës u hap me sirena kundërajrore në aksion në qytete të shumta të Ukrainës, ku sulmet ruse në fronte të ndryshme të hapura nga ushtria e Moskës vazhdojnë të pandërprera. Në Kiev situata është gjithnjë e më dramatike, por ukrainasit nuk po dorëzohen.
Shpërthime të fuqishme janë dëgjuar në qytetin perëndimor të Lviv gjatë orëve të mëngjesit. Në rrjetet sociale janë publikuar pamjet e shtëllungës së madhe të tymit në qiell, me objektivin që nodhet rreth 70 km nga kufiri polak.
Kryebashkiaku i Lviv ka thënë se është goditur një ndërtesë ngjitur me aeroportin. Ky sulm është më i afërti që forcat ruse kryejnë në Lviv që prej nisjes së pushtimit në Shkurt.
#Russian strike on #Lviv airport 🚨 #Russia #Ukraine #RussiaUkraineWar pic.twitter.com/Ux0vqPzAwZ
— Messenger (@ChatterFax) March 18, 2022
Kryebashkiaku ka thënë se asnjë person nuk ka mbetur i plagosur apo i vdekur si pasojë e sulmit me raketa. Ndërtesa në fjalë që u dëmtua ishte një fabrikë mirëmbajtjesh avionësh.
Nga ora 6 e mëngjesit të kësaj të premteje, Rusia shpalli “zonë të ndaluar fluturimi” mbi rajonin separatist të Ukrainës. Kjo është bërë e ditur nga autoritetet e republikës së vetëshpallur të Donjeckut.
Ndalimi i fluturimeve mbi zonë do të zgjatet deri më 26 mars dhe konfirmohet nga agjencia Tass nga aeroporti i Krasnjodarit.
Ndërkohë, Vladimir Putin mund të përdorë kërcënimin bërthamor nëse lufta në Ukrainë zvarritet.
Ky është vlerësimi i fundit nga Agjencia e Inteligjencës së Mbrojtjes së Pentagonit.
“Ndërsa kjo luftë dhe pasojat e saj zvogëlojnë ngadalë forcën konvencionale të Rusisë”, Moska “do të mbështetet gjithnjë e më shumë në parandalimin e saj bërthamor për të projektuar forcë në audiencën e saj vendase dhe jashtë shtetit”, – shpjegoi gjeneral-lejtënant Scott Berrier, kreu i Dia, në një seancë parlamentare sipas asaj që raporton agjencia “Bloomberg”.
“Një okupim i zgjatur i pjesëve të territorit ukrainas kërcënon të dobësojë ushtrinë ruse dhe të zvogëlojë arsenalin e saj të armëve të modernizuara, ndërsa sanksionet ekonomike, mund të shkaktojnë një depresion të zgjatur ekonomik dhe një gjendje izolimi diplomatik”, – shpjegoi oficeri i lartë.
Kombinimi i rezistencës ukrainase dhe sanksioneve ekonomike, do të kërcënojë “aftësinë e Rusisë për të prodhuar municione të drejtuara me saktësi,” vazhdoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje