.png)
Liga e Kampionëve flet anglisht. Në finalen e sotme që zhvillohet në Porto, Mançester Siti i Pep Guardiolës do të tentojë trofeun më të rëndësishëm ndaj Çelsit të Tuhel, gjermanit që mori drejtimin e bluve gjatë sezonit, duke zënë vendin e Lampard. Një derbi mes dy skuadrave angleze që ndeshen në Europë pas 50 vitesh, me një precedent që nuk lë shumë shpresë për Çelsin. Finalen e parë e ka humbur ndaj një tjetër ekipit të Mançesterit, ndaj Junajtid.
Sfida është Siti-Çelsi, por edhe Guardiola kundër Tuhel, dy trajnerë avangardë në panoramën e futbollit botëror, të mbështetur fuqishëm nga portofoli i klubeve përkatëse.
Të dyja skuadrat kanë luajtur në “Estadio do Dragao” këtë sezon, Siti në fazën e grupeve, në ndeshjen e vetme që nuk e ka fituar këtë edicion (0-0), kurse Çelsi fitoi 0-2 kundër të zotëve të shtëpisë në ndeshjen e parë çerekfinale. Për të ardhur në finale Siti ka eliminuar dy Borusiat, Gladbah dhe Dortmund, si dhe PSG-në e Nejmar e Mbape. Çelsi, përveç Portos, ka eliminuar edhe dy skuadrat e Madridit, Atletikon në 1/8-at dhe Realin në gjysmëfinale.
Për këtë ecuri, sfida mes Guardiolës e Tuhel shndërrohet në motiv interesi në atë që mund të jetë një finale spektakolare, e zhbllokuar shpejt, ose një ndeshje shahu, me Çelsin gati për të mbyllur hapësirat në mbrojtje dhe për të kundërsulmuar rrezikshëm.
Lojtarët kyç
Kevin de Bryjne mund të bëjë hakmarrjen e madhe për ata që nuk besuan deri në fund tek ai, duke e aktivizuar në vetëm 9 ndeshje në vitin 2012. Mesfushori belg është “fari” i lojës së Mançester Sitit, që nuk fal në zonën gol, si për sa u përket golave personalë, ashtu edhe për pasimet fituese.
Në krahun tjetër, N’golo Kanté pritet të jetë elementi thelbësor për trajnerin Tuhel, ai pritet të vërë ekluilibër me topat e rikuperuar. Francezi mund të jetë pika e nisjes për kundërsulmet e bluve të Londrës, të cilët duan ta kapin në befasi mbrojtjen e Guardiolës.
Precedentët
Dy skuadrat janë ndeshur tri herë këtë sezon. Çelsi ka fituar dy herë, duke përfshirë një 2-1 në “Etihad Stadium” më 8 maj, në fund të javës kur u kualifikua për në finale të Championsit, ashtu si dhe Siti. Ndeshja u vendos nga një gol në shtesë i Markos Alonso, pasi më parë kishin shënuar Rahim Sterling dhe Hakim Zijesh. Sitit iu desh të shtynte festën për titullin kampion në Premier Ligë. Tuhel e ka mundur Sitin edhe në gjysmëfinalen e “FA Cup” në “Wembley” më 17 prill, me golin vendimtar të Zijesh. Finalja e fundit mes dy skuadrave është ajo e Kupës së Ligës 2018/19, ku Siti fitoi 4-3 me penallti.
Finalet
Mançester Siti është klubi numër 42 që shkon në finale të Championsit, dubutuesi i tretë radhazi në një finale pas Totenhemit dhe PSG-së. Nëse fitojnë, “qytetarët” bëhen skuadra e 23-të që ngre trofeun prestigjioz, risia e parë pas 2012-ës, kur ishte pikërisht Çelsi që shkroi emrin për herë të parë. Në palmaresin e Sitit është një Kupë Kupash.
Çelsi luan finalen e tretë të Ligës së Kampionëve. Në dy të parat ka një fitore dhe një humbje, në të dy rastet me penallti. Trajneri Tomas Tuhel ishte në stolin e PSG-së në finalen e kompeticionit të fundit, ku humbi ndaj Bajern Mynihut. Tuhel është trajneri i parë në gjendje të çojë dy skuadra të ndryshme në dy finale radhazi. Në palmares Çelsi ka dy Kupa Kupash, dy Liga Europe dhe një Superkupë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje