.png)
Luhen sot ndeshjet e kthimit të turit të parë eliminator të Ligës së Kampionëve dhe në fushë do të jenë tri skuadra shqiptare: Teuta kampione e Shqipërisë, Prishtina kampione e Kosovës dhe Shkëndija e Tetovës kampione e Maqedonisë së Veriut. Pas rezultateve të ndeshjeve të para, vetëm kjo e fundit ka shpresa për kualifikim.
Teuta u mund thellë, 0-4, në “Niko Dovana” një javë më parë. Një rezultat që nuk lë vend për shpresë dhe objektivi i durrsakëve do të jetë një paraqitje sa më dinjitoze në fushën e Sherif Tiraspolit. Trajneri Martini pritet të luajë me të njëjtin formacion, me përjashtim të Bregut të larguar, që mund të zëvendësohet nga Gruda.
Me të njëjtin objektiv si durrsakët do të zbresë sot në “Fadil Vokrri” edhe Prishtina, që vjen pas humbjes 3-0 në Hungari ndaj Ferencvaroshit të Myrto Uzunit. Kualifikimi është praktikisht i pamundur, edhe pse në futboll mund të ndodhë gjithçka.
Skuadra tjetër shqiptare e Championsit, Shkëndija e Tetovës, gjithashtu e ka humbur ndeshjen e parë, por me rezultatin e ngushtë, 0-1. Tetovarët e drejtuar nga trajneri Ernest Gjoka luajnë në transfertë me Murën, ekipin kampion të Sllovenisë. Shkëndija është ende në lojë, edhe pse koeficienti i vështirësisë është i lartë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje