.png)
Ilir Meta dhe Edi Rama u bashkuan sërish, këtë herë për të nderuar Dëshmorët e Kombit me rastin e 29 Nëntorit, Ditës së Çlirimit.
Të shoqëruar edhe nga kryetarja e Kuvendit, Rama dhe Meta vendosën nga një kurorë me lule në Memorialin Nëna Shqipëri.
Ashtu si në ceremoninë e ngritjes së Flamurit në Vlorë, me rastin e 109-vjetorit të Pavarësisë, edhe këtu dy udhëheqësit shmangën si komentet publike, ashtu edhe shfaqjen e gjatë pranë njëri-tjetrit, duke mos i fshehur raportet e tendosura që ekzistojnë.
I vetmi që i bashkoi ishte sinjali i transmetimit, që siç duket e kanë marrë nga i njëjti burim, pasi kohëzgjatja e videove të transmetuara prej tyre në rrjetet sociale është e njëjtë, 10 minuta e 35 sekonda.
E para që ka reaguar përmes rrjeteve sociale ka qenë kryetarja e Kuvendit, Lindita Nikolla. Ajo thotë se “sot është dita e mirënjohjes ndaj çlirimtarëve” dhe bëri thirrje për bashkim në përpjekjet për të avancuar reformat.
“Është koha të jemi bashkuar për përshpejtimin e rrugëtimit evropian të Shqipërisë, për të thelluar e avancuar reformat, në shërbim të zhvillimit të Shqipërisë, konsolidimit të demokracisë dhe rritjes së mirëqenies së të gjithë qytetarëve”, shkroi Nikolla.
Rama nga ana tjetër, e uroi Ditën e Çlirimit me përfundimin, sipas tij, të Rrugës së Arbrit, e parashikuar që të hapet për qarkullim këtë të hënë.
Ndërkohë, edhe këtë përvjetor të Çlirimit, politika mbeti e ndarë. Lulzim Basha dhe drejtuesit e tjerë të Partisë Demokratike vendosën një ditë më parë kurora me lule në nderim të Dëshmorëve të Kombit, duke përkujtuar në të njëjtën datë si Ditën e Pavarësisë, ashtu edhe Çlirimin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje