.png)
Faza e dytë e një studimi të OBSH-së mbi origjinën e Covid-19, duhet të jetë “pa ndërhyrje”. Kjo është ajo që Bashkimi Europian dhe Shtetet e Bashkuara të Amerikës kërkojnë në draftin e fundit të deklaratës që do të miratohet në samitin e planifikuar për 15 qershor.
Bëhet fjalë për një mbështetje të rëndësishme për kërkesën e SHBA-ve, e cila mund të irritojë Kinën, ngurruese përballë hetimeve të reja dhe të vendosur për të hedhur poshtë hipotezën e një rrjedhje të virusit nga laboratorët e saj.
Dokumenti flet për një “shtytje të ripërtërirë në hetimin e origjinës së Covid-19 pas vlerësimeve kontradiktore mbi origjinën e virusit”.
Sa i përket Kinës, BE dhe SHBA-të, po synojnë “konsultim dhe bashkëpunim të ngushtë” brenda kornizës së qasjeve të tyre përkatëse, “të cilat përfshijnë elementë të bashkëpunimit, konkurrencës dhe rivalitetit sistematik”.
BE dhe SHBA-të, “do të vazhdojnë të adresojnë shqetësimet e përbashkëta, përfshirë shkeljet e të drejtave të njeriut në Tibet dhe Xinjiang”.
Ndërkohë, spikat një raport sekret mbi origjinën e Covid 19, i hartuar në maj të vitit 2020 nga një laborator i rëndësishëm i qeverisë amerikane.
Studiuesit arritën në përfundimin se teoria e virusit, i shpëtuar nga një laborator i Wuhanit, ishte e besueshme dhe duhej të ishte hetuar më tej sipas gazetës amerikane “Wall Street Journal”.
Dosja e “Lawrence Livermore National Laboratory”, një strukturë kërkimore në “Biodefence”, me qendër në Kaliforni, financuar kryesisht nga Departamenti i Energjisë i SHBA-ve, ishte një nga punimet e para dhe më autoritare për të kundërshtuar tezën që virusi natyrshëm kaloi nga kafshët tek njeriu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje