.png)
Hetuesit kanë gjetur gjurmë eksplozivi në tubacionet e dëmtuara të “Nord Stream”, duke konfirmuar se kemi të bëjmë me një sabotim, tha këtë të premte(18 nëntor) prokuroria suedeze.
Autoritetet suedeze dhe ato daneze po hetojnë katër dëmtime në tubacionet Nord Stream 1 dhe 2 që lidhin Rusinë dhe Gjermaninë nëpërmjet Detit Baltik.
Në një deklaratë, prokurori suedez që drejton hetimet për dëmtimin e gazsjellësve, Mats Ljungqvist tha: “Gjatë hetimeve që u kryen në vendngjarje në Detin Baltik, u bënë konfiskime të gjera dhe zona është dokumentuar me kujdes. Analizat e kryera tani tregojnë gjurmë të eksplozivit në disa nga objektet e huaja që u gjetën. Puna e avancuar e analizës vazhdon në mënyrë që të mund të nxirren përfundime më të forta për incidentin.”
Më tej në deklaratë thuhet se “hetimi paraprak është shumë kompleks dhe gjithëpërfshirës” dhe se puna vazhdon.
Deklarata nuk përmend asnjë të dyshuar. Ljungqvist vlerëson gjithashtu bashkëpunimin e autoriteteve në Suedi me ato të vendeve të tjera. Ai përfundon duke thënë se nuk mund të japë informacion të mëtejshëm në këtë moment dhe nuk do të ofrojë asnjë akses të mëtejshëm në media.
Në fund të shtatorit, çarjet në shkallë të gjerë në tubacione shkaktuan një rrjedhje gazi që ishte e dukshme nga sipërfaqja e detit Baltik.
Pamjet nënujore nga mesi i tetorit treguan shkallën e dëmit. Në fund të tetorit, ministria ruse e Mbrojtjes akuzoi personelin e marinës britanike për hedhjen në erë të tubacioneve, ndërsa nuk paraqiti asnjë provë për të mbështetur pretendimin, të cilin Londra e mohoi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje