.png)
Fusha e blertë e futbollit u pushtua sot sërish nga dhuna. Një sherr masiv ka ndodhur mes futbollistëve të skuadrave të 19-vjeçarëve të Football Rupublic dhe Teutës, në fundin e ndeshjes. Një shkëndijë mes dy lojtarëve në kohën shtesë, kur rezultati u barazua 2-2, është bërë shkak që fusha e futbollit të kthehet në fushë beteje.
Tapeti i blertë është mbushur nga prindërit e lojtarëve, të cilët, në vend të shuanin sherrin, janë bërë vetë protagonistë të tij, duke goditur njëri-tjetrin. Pamje vërtet të frikshme, që ngrejnë shumë pikëpyetje, sepse nuk është hera e parë që ka dhunë në ndeshjet e fëmijëve. Kush mban përgjegjësi? Organizatorët e ndeshjes, Policia e Shtetit dhe organet që japin dënimet në raste të tilla.
Me shpejtësi ka reaguar FSHF-ja në lidhje me këtë nagjarje dhe ndryshe nga rastet e tjera, pasi ka një thirrje jo vetëm për policinë, por edhe për sistemin gjyqësor. “Federata Shqiptare e Futbollit dënon ashpërsisht dhunën e ndodhur në ndeshjen Football Republic-Teuta, e vlefshme për Grupin B të Kategorisë Superiore U-19. FSHF i bën thirrje Policisë së Shtetit të marrë urgjentisht masat për të arrestuar autorët e ngjarjes dhe kërkon nxjerrjen e tyre para gjykatës, bazuar në Kodin e ri Penal.
Në shume raste Policia e Shtetit nuk ka vepruar në kohë dhe autorët e ngjarjeve të mëparshme ndodhen ende të lirë. Një thirrje shkon dhe për sistemin gjyqësor në Shqipëri, që duhet të zbatojë me rigorozitet Kodin Penal, i cili ruan shenjtërinë e fushës së blertë. FSHF nuk do të lejojë në asnjë çast nëpërkëmbjen e lojës më të dashur të shqiptarëve nga sjelljet e turpshme të disa prindërve dhe autoriteve që nuk reagojnë në kohë”, – shkruhet në reagimin zyrtar të FSHF-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje