.png)
Komisioni i Ligjeve ka nisur shqyrtimin e propozimit të Ministrisë së Drejtësisë për të ndëhyrë në ligjin e ekstradimeve me objektiv lehtësimin e procedurave dhe zbatimit në praktikë të këtij ligji.
Por, gjatë diskutimeve, relatorja Vasilika Hysi ngriti dyshimet se projektligji në fjalë mund të binte ndesh me Kodin e Procedurës Penale, sidomos sa i takon rolit të Prokurorit të Përgjithshëm dhe të drejtuesit të SPAK.
“Prokurori i Përgjithshëm është personi përgjegjës që përfaqëson në Prokurorinë në marrëdhënie me të tretën dhe ndihmën e ndërsjellë. Drejtuesi i SPAK përfaqëson këtë institucion. ai është i pavarur”, tha Hysi.
Deputetja socialiste kërkoi që të saktësohej formulimi i nenit 5 të projektligjit, ku thuhet se “Ministria e Drejtësisë e përcjell kërkesën e huaj pasi vlerëson kushtet e përcaktuara në këtë ligj dhe Kodin e Procedurës Penale. Kërkesa e huaj i përcillet drejtpërdrejt ose nëpërmjet prokurorit të Përgjithshëm, prokurorisë kompetente me juridiksion të përgjithshëm ose, kur është rasti, prokurorit të Prokurorisë së Posaçme”.
Përfaqësuesit e Ministrisë së Drejtësisë thanë se projektligji është në përputhje me Kodin e Procedurës Penale dhe nuk e anashkalon rolin e Prokurorit të Përgjithshëm në këtë proces dhe ndryshimi bëhet për efekt të përshpejtimi procedurash, edhe si një kërkesë e MONEYVAL, që e ka i ka cilësuar këto procedura si tepër burokratike.
Ndryshimi tjetër që propozohet është futja e konceptit të ndarjes së pasurisë së konfiskuar nga një gjykatë e huaj kur personi dënuar e ka atë në Shqipëri. Deri më tani, ligji ekzistues nuk e njihte këtë pjesë dhe pasuria e konfiskuar, ose i transferohej vendit kërkues, ose qëndronte në Shqipëri.
“Dorëzimi ose ndarja e pasurisë së konfiskuar kryhet nëpërmjet marrëveshjeve dypalëshe për dorëzimin e pasurisë së konfiskuar mes shtetit kërkues dhe shtetit të kërkuar, në zbatim të vendimit të gjykatës së huaj, të njohur dhe të ekzekutueshëm sipas legjislacionit në fuqi për njohjen e vendimeve penale të huaja”, thuhet në projektligj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje