.png)
Fidan Aliti është emri i fundit që shtohet në listën e lojtarëve të shitur nga Skënderbeu në kampionate të huaja. Mbrojtësi kosovar do të luajë tani e tutje me Kalmarin në Suedi dhe nga ky transferim, në arkat e klubit korçar do të shkojnë 150 mijë euro. Nuk është një shifër e lartë, por duke ditur që futbollistit në fjalë i përfundon kontrata në fund të sezonit, mund të konsiderohet një lëvizje e mirë.
Skënderbeu do të mbajë gjithashtu edhe 25% të vlerës së kartonit të futbollistit, që do të thotë se nëse Kalmari e shet në të ardhmen Alitin, klubi korçar përfiton sërish financiarisht. Një politikë e ndjekur kjo edhe me futbollistë të tjerë në të kaluarën. Kampionati shqiptar humbet kështu një nga mbrojtësit më të mirë. Kosovari ka qenë titullar i padiskutueshëm me Skënderbeun këtë sezon. Ai erdhi te kjo skuadër verën e vitit 2017 dhe pati një rritje të konsiderueshme. Shitja e tij ishte vetëm çështje kohë për Skënderbeun, duke pasur parasysh ofertat për të. Vitet e fundit Skënderbeu ka shitur disa lojtarë, siç janë Peter Olajinka, Bernard Berisha, Liridon Latifi, Xhejms Adeni, Kristal Abazaj etj. Shitje që kanë mbushur arkën e klubit dhe kjo është një politikë që Skënderbeu vazhdon ta ndjekë, duke afruar lojtarë me kualitet, për t’i shitur më pas jashtë vendit.
Trajnerit Orges Shehi i është hapur një problem tashmë: i duhet të vendosë për zëvendësuesin e Alitit, i cili me shumë mundësi do të jetë afrikani Kaba Sambou. Fidan Aliti gjen në kampionatin suedez mbrojtësin e Kombëtares, Egzon Binaku, i cili aktivizohet me Malmoen. Mbrojtësi është titullar edhe me kombëtaren e Kosovës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje