.png)
Gazeta Si – Ministria holandeze e Mbrojtjes tha se dy prej avionëve të saj luftarakë F-35 dje kapën një formacion prej tre avionësh luftarakë rusë mbi Poloni dhe i shoqëruan ata jashtë hapësirës ajrore.
Tre avionë rusë gati sa nuk kanë shkelur hapësirën ajrore të NATO-s së fundmi, duke detyruar aleatët të ndërhyjnë për largimin e tyre nga zona pranë Polonisë.
Ministria holandeze e Mbrojtjes dhe vetë komanda ajrore e NATO-s njoftuan se avionët e ushtrisë ruse janë pikasur teksa afroheshin nga Kalinigradi e më pas u shoqëruan deri në distancën e duhur nga hapësira ajrore e aleancës.
Për kryerjen e operacionit, janë përdorur fillimisht dy avionë luftarakë F-35 të policimit ajror të forcave të ushtrisë holandeze që kanë bërë konstatimin e avionëve rusë.
NATO tha se bëhej fjalë për një avion zbulimi të emëruar IL-20M Coot-A që shoqërohej nga dy avionë sulmues Su-27 Flankers.
Pas konstatimit të tyre, avionët holandezë kanë kontaktuar me autoritetet e tjera të aleancës dhe në operacion janë përfshirë edhe avionët gjermanë e francezë Eurofighters, të cilët kanë bërë shoqërimin dhe largimin e aeroplanëve rusë.
Në faqen zyrtare të komandës ajrore të NATO-s thuhet se tre avionët rusë përbënin rrezik për përdoruesit e tjerë të hapësirës ajrore duke injoruar rregullat ndërkombëtare të sigurisë ajrore.
Zona e Kalinigradit ku ndodhi incidenti ajror, është një enklavë ruse e bregdetit Baltik midis Polonisë dhe Lituanisë, të cilat janë vende anëtare të aleancës ushtarake perëndimore të NATO-s.
Avioni i madh Il-20M Coot-A është emri raportues i NATO-s për avionin rus të zbulimit Ilyushin Il-20M, ndërsa Su-27 Flankers është emri raportues për avionët luftarakë Sukhoi Su-28.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje