.png)
Gazeta Si – FSHF është rikthyer në Komitetin Olimpik Kombëtar Shqiptar. Institucioni që drejton futbollin në vend ka marrë sot pjesë në asamblenë e përgjithshme.
Më parë FSHF e kishte refuzuar pjesëmarrjen. Presidenti i saj, Armand Duka, ka pasur jo pak përplasje me këtë institucion.
Arsyeja e rikthimit duket se ka të bëjë me çështjen e shumëpërfolur të Këshillit të Arbitrazhit Sportiv. Sepse në rend dite asambleja e sotme kishte edhe miratimin e rregullores së KAS-it shqiptar.
FSHF, me anë të juristit Envi Icka, e kundërshtoi rregulloren për faktin se ishte ndryshe nga ajo që kishte marrë 20 ditë më parë. Gjithsesi, rregullorja u miratua me shumicë votash.
Në vazhdim do të ketë një tjetër asamble, ku sipas presidentit të KOKSH-it, Fidel Ylli, do të zgjidhen 3 anëtarët e KAS-it shqiptar.
Me krijimin e këtij institucioni, shumë probleme ligjore sportive do të zgjidhen në Shqipëri. Nuk do të jetë më nevoja për t’i ndjekur çështjet në gjykatat jashtë vendit.
Asambleja miratoi edhe buxhetin për projektin e sportit në shkolla. U pranuan dy anëtarë të rinj në Komitetin Olimpik, Shoqata Kombëtare Padelit dhe Federata Shqiptare e Ndeshjes së Lirë.
Po ashtu, u vendos që atleti Izmir Smajlaj të jetë anëtar i Komitetit Ekzekutiv të KOKSH-it.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje