.png)
Vendin e lënë bosh në stolin e Kukësit nga Shpëtim Duro do ta zërë Orges Shehi. Ish-portieri dhe ish-trajneri i Skënderbeut ka arritur marrëveshjen me presidentin Safet Gjici dhe rikthehet kështu të drejtojë një skuadër pas më pak se një viti pushim. Një lëvizje e konfirmuar si nga presidenti Gjici, ashtu edhe nga vetë trajneri.
Pasi vari “këpucët në gozhdë” në vitin 2018, durrsaku mori drejtimin e Skënderbeut, ekipit ku mbajti shiritin e kapitenit dhe fitoi edhe 7 tituj kampion. Për një sezon drejtoi korçarët dhe tani emërohet në krye të Kukësit, ku ka firmosur deri në verën e vitit 2021.
Klubi kuksian largoi trajneri Duro pas barazimit dramatik në Durrës me Teutën. Fillimisht u tha se pritej vetëm zyrtarizimi i Skënder Gegës, por gjithçka u prish në momentet e fundit. Nga burime konfidenciale të Gazeta Si mësohet se ish-trajneri i Partizanit nuk pranoi kushtin e titullit kampion për rinovimin e kontratës edhe për sezonin e ardhshëm. Pasi ra poshtë marrëveshja me Gegën, klubi vendosi të emëronte përkohësisht Rrahman Hallaçin trajner, ish-kapitenin e skuadrës. Në fund u mor vendimi për t’i besuar Orges Shehit, 42-vjeçarit që këtë sezon ka bërë opinionistin sportiv.
Kukësi është 4 pikë larg vendit të parë, që mbahet nga Tirana. Në pjesën e mbetur të kampionatit është e vështirë që të rikuperohet një diferencë e tillë, por veriorët do të luftojnë deri në fund. Tri javët e fundit rezultuan zhgënjyese për kuksianët, të cilët shumë pikë dhe njëkohësisht edhe kryesimin e Superiores. Me uljen e Shehit në stol pritet që situata të ndryshojë.
Pas prezantimit si trajneri i ri i Kukësit nga drejtori sportiv Nderim Nexhipi dhe administratori Lavdërim Gjici, Shehi tha: “Suksesi është i rëndësishëm për një trajner. E zgjodha Kukësin, sepse është një skuadër e madhe. Më shtyu cilësia e klubit dhe lojtarëve. Është e rëndësishme të kesh grupin. Kam qenë pa skuadër këto kohë, isha si analist në një studio dhe e kam ndjekur Kukësin”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje