.png)
Gjykata e Apelit ka pranuar sot kërkesën e Izet Haxhisë, ish-truproja e Sali Berishës i akuzuar për vrasjen e liderit të dhjetorit, Azem Hajdarit.
Gjykata ka vendosur të pranojë kërkesën e Izet Haxhisë për rigjykim në Gjykatën e Shkallës së Parë me trupë tjetër gjykuese.
Avokati i tij Bashkim Nikolla deklaroi se në seancën e radhës do të paraqiten provat e reja për të provuar pafajësinë e tij lidhur me akuzat për vrasjen e Azem Hajdarit dhe do të thirren dëshmitarë ku i pari në listë do të jetë ish-presidenti Berisha. ”Më në fund pas një kohe të gjatë vendoset një e drejtë proceduriale në vendin e duhur. Gjykata në vendimin e sotëm është në përputhje me konventën, që do të thotë se është e drejta e çdo të gjykuari të jetë në seancë. Ky është një vendim shumë i drejtë. Ky vendim e rikthen çështjen në Gjykatën e Shkallës së Parë.
Kemi siguruar të drejtën të dëgjohemi. Provat janë materiale, tabulante dhe dëshmitarë. Me të gjitha këto ne do të provojmë pafajësinë që i është faturuar të përfaqësuarit prej meje. Në krye të listës së dëshmitarëve që do të thirren është Sali Berisha”, është shprehur avokati Bashkim Nikolla.
Në vendimin e vitit 2012 Izet Haxhia ishte dënuar me 25 vjet burg, por sipas Apelit, Haxhisë i është mohuar e drejta për t’u mbrojtur dhe për këtë arsye çmon se vendimi duhet prishur dhe kthyer për rigjykim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje