.png)
Në Greqinë fqinje është shënuar viktima e tretë nga koronavirusi ndërkohë që i gjithë rajoni ka mbyllur sot kufijtë.
Një 92-vjeçare që u diagnostikua me koronavirus ka humbur sot jetën ndërkohë që dy të afërm të së moshuarës janë izoluar në spital.
Përfaqësuesi i Ministrisë së Shëndetësisë Sotiris Tsiodras të premten njoftoi masa të reja për të frenuar përhapjen e koronavirusit, duke thënë se të gjitha qendrat, kafenetë, baret do të mbyllen megjithëse supermarketet do të mbeten të hapura.
“Pikat ushqimore që ofrojnë dërgimin e porosive në shtëpi do të jenë në gjendje të rrinë hapur”, tha ai. Masat erdhën disa orë pasi Ministria e Kulturës njoftoi se të gjitha muzetë dhe vendet arkeologjike do të mbyllen për dy javë. Ndërkohë, numri i rasteve të koronavirusit në Greqi është rritur në 190.
Ndërkohë, Serbia, Shqipëria dhe Rumania kanë mbyllur shumë prej vendkalimeve kufitare për të luftuar përhapjen e koronavirusit, duke paralizuar kalimin në pjesë të Ballkanit.
Të gjitha vendet e rajonit ose kanë ndaluar hyrjen ose kanë prezantuar masa speciale kufizuese për pasagjerët që vijnë nga vendet e rrezikuara nga koronavirusi.
Serbia ka mbyllur 44 vendkalime kufitare me Rumaninë, Bullgarinë, Maqedoninë e Veriut, Malin e Zi, Bosnjën dhe Kroacinë, në mënyrë që policia e saj kufitare të mund të përqendrohet në vendkalimet kryesore dhe më të përdorura. Në Serbi ka 1 rast të konfirmuar me koronavirus.
Rumania ka mbyllur disa pika kalimi që lidhin vendin me tokë me fqinjët e saj. Mbylljet prekin pikat kufitare me Hungarinë, Ukrainën, Bullgarinë dhe Moldavinë, njoftoi Ministri i Brendshëm, Marcel Vela.
Ai gjithashtu tha se autoritetet serbe kishin mbyllur në mënyrë të njëanshme disa pika kalimi, me sa duket pa njoftuar së pari Rumaninë. E gjithë qeveria rumune është në izolim ndërkohë që numri i rasteve ka arritur në 70.
Shqipëria ka mbyllur në mënyrë të njëanshme disa vendkalime kufitare me Malin e Zi, Kosovën dhe Maqedoninë e Veriut.
Maqedonia e Veriut ku numri i të prekurve ka arritur në 13 nuk ka mbyllur asnjë kufi deri më tani, por, si rezultat i lëvizjeve të njëanshme të bëra nga fqinjët e saj, dy vendkalimet me Serbinë dhe tre me Shqipërinë janë mbyllur.
Kroacia, ku ka 31 raste gjithashtu nuk ka mbyllur kufijtë e saj, madje edhe me Italinë, vendi më i prekur në Europë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje