.png)
Periudhë mjaft delikate për Zllatan Ibahimoviç. Nuk ka paqe për të në këto ditë të fundit. Pas kartonit të kuq ndaj Parmës dhe drekës në restorant në një zonë të kuqe e pa maskë, nga Suedia vjen një tjetër lajm tronditës.
E përditshmja “Aftonbladet” shkruan se sulmuesi 39-vjeçar ka shkelur kodin e FIFA-s dhe UEFA-s, duke qenë bashkëpronar i kompanisë së basteve sportive “Bethard.com”, me seli në Maltë. Dy intitucionet drejtuese të futbollit botëror dhe atij europian nuk lejojnë që lojtarët që marrin pjesë në aktivitet të kenë lidhje financiare me kompani të këtij lloji.
Fakti që Ibrahimoviç ka ende kuota te “Bethard” i është konfirmuar gazetës suedeze nga administratori i deleguar i kompanisë, Erik Skarp. Nga disa verifikime të fundit ka rezultuar se kompania “Unknown AB” e Zllatan Ibrahimoviç zotëron rreth 10% të aksioneve të “Gameday Group PLC”, aksioneri i vetëm i “Bethard”.
Rregullat e FIFA-s aplikohen në të gjitha kompeticionet dhe rregullat e UEFA-s aplikohen në të gjitha ndeshjet. Kjo do të thotë se në shënjestër janë si ndeshjet kualifikuese të Botërorit, ku Ibrahimoviç ka marrë pjesë kohët e fundit, ashtu edhe ndeshjet e Ligës së Europës, ku ka luajtur Milani.
Nëse gjithçka konfirmohet edhe zyrtarisht, Ibrahimoviç rrezikon një gjobë rreth 100 mijë euro nga FIFA, por mund të ketë edhe një pezullim të tij nga çdo aktivitet futbollistik maksimumi për 3 vjet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje