.png)
Afrika e Jugut, vendi i parë ku u identifikua varianti mjaft i transmetuehëm i Covid 19, “Omicron”, njoftoi se kishte kaluar kulmin e virusit pa një rritje të ndjeshme të numrit të vdekjeve. “Të gjithë treguesit sugjerojnë se vendi ka të ngjarë të ketë kaluar kulmin e valës së katërt”, të pandemisë, njoftoi Presidenca në një deklaratë, duke shtuar se do të hiqen disa kufizime shëndetësore dhe shtetrrethimi i natës (nga mesnata në orën 04:00).
“Ka pasur një rritje margjinale të vdekjeve në të gjitha provincat”, – vazhdon shënimi. Infeksionet u ulën me gati 30% javën e kaluar (89,781), krahasuar me javën paraardhëse (127,753). Dhe pranimet në spital ranë në tetë nga nëntë provinca.
“Megjithëse varianti Omicron është shumë i transmetueshëm, normat e shtrimit në spital kanë qenë më të ulëta se në valët e mëparshme”, – theksoi presidenca.
Lidhur me lehtësimin e paralajmëruar të kufizimeve, Këshilli i Komandës Kombëtare kundër koronavirusit (KKKK) do të monitorojë situatën dhe do të bëjë ndryshime nëse është e nevojshme ose nëse mbingarkesa në spitale rritet.
“Omicron”, me një numër të lartë mutacionesh që ngrenë shqetësime për rezistencën ndaj vaksinave, u identifikua për herë të parë në Botsvana dhe Afrikën e Jugut në fund të nëntorit.
Sipas Organizatës Botërore të Shëndetësisë, varianti është aktualisht i pranishëm në rreth 100 vende.
Tejet ngjitës, ai prek edhe personat që janë vaksinuar ose që janë infektuar më herët me virusin. Vendi afrikan zyrtarisht më i prekur, Afrika e Jugut, ka raportuar më shumë se 3.4 milionë raste dhe 91 mijë vdekje nga Covid që nga fillimi i pandemisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje