.png)
Belind Këlliçi kandidati i mbështetur nga Sali Berisha dhe Ilir Meta, ( një pjese të konsiderueshme të opozitës), ka filluar fushatën cep me cep të Tiranës. Objektivi i tij është fitorja e Bashkisë së Tiranës duke pasur ne qendër të vëmendjes punën e kundërshtarit politik në garë Erion Veliaj.
Këlliçi nuk do të jetë i vetmi në garë. Grupi “Alibeaj” nuk e ka shpallur ende kandidaturën në “emër të PD” ndërsa përfaqësues të tjerë nga e djathta kanë lëvizur.
Arian Galdini ftoi qytetarët pak ditë më parë që të mbështesin nismën e tij. Ai u prezantua si kandidati i të djathtëve kundër Berishës dhe Ilir Metës.
“…Dua të jem kandidat i qytetarëve shqiptarë, fillimisht i të djathtëve që janë qartësisht kundër Sali Berishës dhe Ilir Metës. Unë besoj që ka qytetarë që besojnë tek e djathta, që nuk e duan më opozitën të marrë peng nga Sali Berisha e Ilir Meta. Dua mbështetjen e qytetarëve të Tiranës, pavarësisht përkatësisë politike”, eshte shprehur Galdini
Ish-deputetja e Partisë Demokratike, Lajla Përnaska ka deklaruar gjithashtu se do të rikthehet në politikë.
Sipas saj, rruga e vetme për t’u kthyer në politikë është kandidimi për Bashkinë e Tiranës.
“Për mua nuk ka rëndësi sigla. Për mua ka rëndësi impenjimi, përgjegjësia dhe në respektim të rregullave dhe sistemit që kemi në fuqi, ne të japim kontribut. Unë jam e gatshme të jap kontributin tim për Tiranën. E njoh shumë mirë Tiranën dhe problematikat e saj”
Edhe Nisma “Thurje”do të prezantohet e vetme për zgjedhjet lokale. Kreu i saj, Endri Shabani tha se vizioni i tyre është për një Tiranë krejt ndryshe.
Shabani u shpreh për mediat se një nga synimet e nismës “Thurje” për Tiranën është të zgjidhet problemi i transportit publik duke ofruar transport falas për pensionistët dhe studentët.
“… Për hir të së vërtetës nuk ka qenë kurrë më i qartë kontrasti midis regresit dhe progresit”, tha ndër të tjera Shabani, pa përmendur emrin e kandidatit.
Në të njëjtën ditë pedagogu Arlind Qori ka shpallur kandidaturën për bashkinë e Tiranës nën siglën “Lëvizja BASHKË”.
“…Të dashur miq, me apo pa njohjen e gjykatës, me 3000 apo 7000 nënshkrime qytetarësh, me apo pa mbulim mediatik, me të gjithë të pushtetshmit, oligarkët e zullumqarët kundër, por me zemrën dhe sakrificat e përditshme të qindra shoqeve e shokëve të mi në Lëvizjen BASHKË dhe, me shpresë, me mbështetjen e shumë e më shumë qytetarëve në këtë rrugë, emrin tim do të keni mundësi ta lexoni në fletën e votimit për kandidat të Bashkisë së Tiranës. BASHKË PËR TIRANËN!”, shkruan Qori.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje