.png)
Komisioni Europian thotë se nuk komenton palët e treta, duke iu referuar këtu deklaratave të Kryeministrit Edi Rama, që ngriti dyshimet se po ndërhyn në proceset e brendshme zgjedhore të një vendi kandidat për anëtarësim.
Gjithsesi, KE sqaron se dalja e komisioneres së Arsimit, Mariya Gabriel në një takim online ku ndodhej edhe kreu i PD-së, Lulzim Basha ishte pjesë e një tryezë të përbashkët për sfidat e arsimit rajonal të organizuar nga një universitet austriak dhe jo takim elektoral i opozitës shqiptare.
Zëdhënës të KE dhe të vetë Komisioneres Gabriel thonë se ajo nuk ka “diskutuar” me askënd për arsimin, ashtu sikundër thuhet në njoftimin e Partisë Demokratike në lidhje me këtë tryezë, por thjesht ka mbajtur fjalën e saj.
“Komisioni nuk komenton mbi komentet e palëve të treta. Lutemi të keni parasysh që Komisionerja Mariya Gabriel mori pjesë në Tryezën e 18-të Rrumbullakët mbi Arsimimin, me ftesë të Universitetit Modul të Vjenës, i cili është organizatori i këtij eventi”, thuhet në një deklaratë të zëdhënëses së KE, Anna Pisonero për Euroneës Albania.
Pisonero thotë se pjesëmarrja e komisioneres ishte e kufizuar vetëm në dhënien e një fjalimi kryesor.
“Fjalimi, i cili është i publikuar në faqen e internetit të Komisionit, është i fokusuar mbi iniciativat e fundit europiane në fushën e arsimimit dhe të kërkimit, të cilat vlejnë për të gjithë rajonin e Ballkanit Perëndimor, përfshirë Shqipërinë. Komisionerja nuk bëri ndonjë deklaratë për ndonjë parti politike, por mbajti një fjalim mbi çështjet që kishin të bënin me fushën e saj”, thuhet në reagim.
Më herët, në një reagim për A2, vetë Mariya Gabriel konfirmon të njëjtën deklaratë të KE-së, por duke sqaruar se takimi në fjalë ishte mbajtur që më 18 mars.
“Pjesëmarrja ime ishte e kufizuar në mbajtjen e një fjalimi. Fjalimi përqendrohej në iniciativat e reja dhe iniciativat e ardhshme evropiane në fushën e arsimit dhe kërkimit shkencor, që janë të rëndësishme edhe për rajonin e Ballkanit Perëndimor, përfshirë Shqipërinë”, shprehet zëdhënësja e Gabriel.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje