.png)
Vërejtja e Gent Ibrahimit ndaj anëtarëve të Këshillit të Lartë të Prokurorisë për mungesën e pyetjeve në adresë të Prokurorit të Përgjithshëm, Olsian Çela është reflektuar gjatë raportimit para këtij institucioni nga kreu i Prokurorisë së Posaçme, Arben Kraja.
Pyetjet ndaj Krajës lidheshin më shumë me çështje organizative dhe e përbashkëta e fjalës së të gjithë anëtarëve të KLP-së drejtuar kreut të SPAK-ut ishte vlerësimi.
Me fjalët “seriozë, seriozitet, të besueshëm në sytë e qytetarëve, institucion i fortë”, të gjithë anëtarët e KLP-së vlerësuan në unanimitet punën e SPAK-ut dhe të vetë Arben Krajës si drejtues i kësaj strukture.
Në raportimin e tij, Arben Kraja foli kryesisht për çështjet organizative dhe në lidhje me çështjet e bujshme që heton Prokuroria e Posaçme i ceku ato parimisht, duke deklaruar se ligji ja ndalon raportimet specifike të tyre, si para KLP-së, ashtu edhe para Kuvendit.
Për çështjet organizative përmendi punën për ndërhyrjen ligjore që përcaktoi pagat e prokurorëve, drejtuesit dhe anëtarëve të BKH-së. Foli gjithashtu edhe për ndërhyrjen tjetër në ligjin e kompetencave, që hyn në fuqi nga 1 qershori, ku reduktohen dosjet e korrupsionit të cilësuara si të vogla.
“Erdhi nga praktika e punës, kishim të gjitha rastet e korrupsionit dhe në disa raste u bënë publike vepra penale të rëndomta. Këto nuk janë raste për t’u mburrur dhe nuk mund të shpenzojnë energji prokurorët për këto hetime. U arrit që të përfshihej një paketë ligjore që hyn në fuqi më 1 qershor që lehtëson punën në raport me korrupsionin e vogël dhe fokuson punën më shumë aty ku duhet”, tha Kraja.
Anëtarët nuk patën vërejtje në lidhje me raportin, që e vlerësuan si cilësor dhe shtjellues. Vërejtje nuk pati as nga kreu i KLP-së, Gent Ibrahimi, që një ditë më parë “u përplas” me Prokurorin e Përgjithshëm, Olsian Çela.
Çela kërkoi rritje të kompetencave të Prokurorit të Përgjithshëm. Ai theksoi se roli i tij është i kufizuar dhe se është e rëndësishme të ketë më shumë hapësirë. Por, Ibrahimi e cilësoi të parakohshme kërkesën e tij, duke shtuar se kryeprokurori duhet të përqendrohet në çështje të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje