.png)
Koreja e Veriut ka rihapur linjat e komunikimit me Korenë e Jugut, disa muaj pasi ndërpreu një linjë telefonike ndërkufitare.
Ky veprim vjen disa ditë pasi lideri i vendit komunist Kim Jong-un tha se ishte i gatshëm të rivendoste komunikimin me kusht.
Sidoqoftë, Pyongyang tha gjithashtu se rivendosja e marrëdhënies së tyre varej nga “qëndrimi i autoriteteve të Koresë së Jugut”.
Koreja e Veriut gjithashtu ka shtuar testet e saj ushtarake kohët e fundit.
Ajo ka lëshuar katër raketa në më pak se një muaj – një shenjë se nuk ka ndërmend të ngadalësojë zhvillimin e armëve.
Të hënën në mëngjes, ministria e unifikimit e Koresë së Jugut tha se zyrtarët nga të dy Koretë shkëmbyen thirrjen e tyre të parë telefonike që nga gushti.
“Me restaurimin e linjës së komunikimit Jug-Veri, qeveria vlerëson se është siguruar një bazë për rimëkëmbjen e marrëdhënieve ndër-koreane,” tha ministria në një deklaratë.
Linjat telefonike të komunikimit mes dy palëve janë ndërprerë – dhe restauruar – disa herë.
Në vitin 2020, pas një samiti të dështuar midis Veriut dhe Jugut, Pyongyang hodhi në erë një zyrë ndër-kufitare koreane që ishte ndërtuar për të përmirësuar komunikimet.
Në të njëjtin vit, Koreja e Veriut ndërpreu të gjitha linjat e komunikimit me Jugun, duke përfshirë një linjë telefonike midis udhëheqësve dhe kanaleve të komunikimit ushtarak pasi tensionet u përkeqësuan.
Linja telefonike u rivendos shkurtimisht këtë gusht, por u ndërpre përsëri pasi Koreja e Jugut mori pjesë në stërvitjet e përbashkëta ushtarake me SHBA.
Koreja e Veriut dhe ajo e Jugut janë teknikisht ende në luftë, sepse asnjë marrëveshje paqeje nuk u arrit kur përfundoi Lufta Koreane në 1953.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje