.png)
Një ndeshje me dyer të mbyllura. Ky është dënimi i dhënë nga UEFA për Bullgarinë për koret raciste dhe përshëndetjet naziste gjatë ndeshjes me Anglinë, e vlefshme për eliminatoret e Europianit 2020. UEFA ka marrë vendimin dy javë pas asaj ndeshjeje të luajtur në “Vasil Levski” të Sofjes. Bie poshtë kështu hipoteza e ngritur fillimisht për përjashtimin e kombëtares bullgare nga kompeticioni. Një dënim i butë nga “qeveria” e futbollit europian, edhe pse bëhet fjalë për dy akuza shumë të rënda, siç janë racizmi dhe nazizmi.
Bullgaria do ta zhvillojë ndeshjen e 17 nëntorit kundër Republikës Çeke pa tifozë. Ka edhe një paralajmërim për Bullgarinë, që do të thotë se nëse do të ketë përsëritje të këtyre incidenteve, automatikisht dënohet edhe një ndeshje tjetër pa tifozë. Po ashtu, Federata Bullgare e Futbollit është gjobitur me 85.000 euro. Gjatë ndeshjes Bullgari-Angli, arbitri u detyrua ta ndërpriste ndeshjen dy herë, sepse ndaj lojtarëve me ngjyrë të ekipit mik pati kore raciste. Ndeshja u fitua 0-6 nga anglezët.
Pas ndeshjes pati arrestime tifozësh, ndërsa trajneri i Bullgarisë dha dorëheqjen. Legjenda bullgare e futbollit, Hristo Stoiçkov, u tregua shumë i ashpër dhe kërkoi dënim maksimal për Bullgarinë, përjashtimin e saj nga ndeshjet kualifikuese. Tema e racizmit është ndër më të diskutuarat aktualisht, ku shumë personalitete të futbollit gjykojnë se masat janë shumë të buta. I fundit ishte Jaja Ture, i cili akuzoi FIFA-n dhe UEFA-n se nuk duan t’ia dinë fare për racizmin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje