.png)
Duke marrë shkas nga letra e publikuar nga Presidenti Ilir Meta, Partia Demokratike akuzon Kryeministrin Edi Rama për shpërdorim detyre dhe se mund të kishte parandaluar krizën e krijuar në Kakavijë, pasi është informuar për ndryshimin e regjimit të lëvizjes nga pala greke që më 5 gusht.
“11 ditë më parë Edi Rama e dinte se çfarë do të ndodhte, por vazhdoi pushimet pa e vënë ujin në zjarr për mijëra shqiptarë që e pësuan prej neglizhencës së tij kriminale. Ai nuk bëri asgjë. Shkoi me pushime luksoze dhe i la shqiptarët të dynden në pikën kufitare pa asnjë lajmërim, pa asnjë masë për të parandaluar atë katastrofë humanitare”, deklaroi Sekretari për Marrëdhëniet me Jashtë në PD, Arben Kashahu.
Jo vetëm kaq. PD thotë se në përpjekje për t’u justifikuar, Kryeministri Edi Rama ka gënjyer qytetarët duke u shitur si aktuale foto të katër viteve më parë në kufirin mes Greqisë dhe Bullgarisë.
“Tradhtia e tij ndaj shqiptarëve vazhdon edhe sot, kur genjen duke i shitur fotot e 4 viteve më parë në kufirin bullgaro-grek si bllokim të kufirit sot, i cili ka zgjatur vetëm për pak orë dhe pa arsye të ngjashme me Shqipërinë. Shkrimi i i gazetës greke Kathimerini që paraqitet në foton e Edi Ramës sot, i përket 21 shkurtit 2016. Megjithatë, asnjë foto nga asnjë kufi tjetër i Europës nuk justifikon dot dështimin e Edi Ramës dhe braktisjen e shqiptarëve”, vijoi Kashahu.
Sekretari për Marrëdhëniet me Jashtë në PD i referohej një postimi të mëhershëm të Kryeministrit, ku shfaqej një varg me kamionë me shënimin e Ramës se radhë të gjatë automjetesh ishin krijuar edhe në kufirin mes Bullgarisë dhe Greqisë.
“Sipas gazetës “Ekathimerini” radha e veturave që pritën nga Bullgaria në doganën e Kulatas në Greqi,shkoi 10 km,ndërsa ajo e kamionëve arriti 15 km!Por Presidenti bullgar s’doli të fajësojë qeverinë e as i quajti qytetarët pa atdhe e pa shtet!Mëso Ilir se s’të ka borxh Shqipëria!”, shkruante Kryeministri.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje