.png)
Gazeta Si – “Shumë kriza”. Kryeministrja moldave Natalia Gavrilita e justifikoi kështu dorëheqjen e saj këtë të premte.
Ekonomistja foli për krizën energjetike, inflacionin, rreziqet që lidhen me luftën në Ukrainën fqinje.
Por ndoshta origjina e vendimit të papritur gjendet në deklaratat e djeshme të presidentit ukrainas Zelenski. “Inteligjenca ime, – deklaroi Zelenski, – ka përgjuar planet për destabilizimin e Moldavisë”.
Ajo ukrainase mund të mos ketë qenë e vetmja kambanë alarmi. Shumica e ministrave të Gavrilitës kanë kaluar pesë ditët e fundit në Bruksel.
Takimet, informimet, konsultimet me evropianët (dhe amerikanët) mund t’u kenë paraqitur atyre një skenar veçanërisht të mprehtë që do të arrijë në të ardhmen e afërt. Qeveria u kthye dje në Moldavi dhe dorëheqjet u zyrtarizuan sot.
Qeveria e vendit më të varfër në Evropë është dhe sipas të gjitha gjasave do të mbetet në orbitën perëndimore.
Presidentja pro-evropiane, Maia Sandu i dha sot detyrën për të formuar një qeveri të re Dorin Recean.
PAS, Partia e Aksionit dhe Solidaritetit të kryeministrit në largim, ka një shumicë solide në Parlament të fituar në zgjedhjet e vitit 2021 dhe nuk ka pasur ndarje në formacionin politik.
Recean, një ish-ministër i Brendshëm, ishte këshilltar i Sandu për sigurinë e brendshme deri pak orë më parë dhe në thelb është një njeri i njohur mirë në qarqet e shërbimeve sekrete.
Kryeministri i ri ka dy javë kohë për t’u paraqitur në Parlament dhe për të fituar besimin.
Ashtu si Gjeorgjia, edhe ish-Republika Socialiste Sovjetike e Moldavisë po merret me praninë e trupave ruse në pjesë të territorit të saj, dhe ashtu si Gjeorgjia, Moldavia është gjithashtu e shqetësuar se oreksi i presidentit Putin për “hapësirën sovjetike” mund të çojë në manovra destabilizuese.
Kjo mund të ndodhë përmes bashkëpunimit të politikanëve pro-rusë apo edhe përmes ndërhyrjes së drejtpërdrejtë ushtarake nga Moska.
Natalia Gavrilita është një ekonomiste, me diplomë master në Administratën Publike në Harvard, një perëndimore e pastër, por ndoshta e pa pajisur sa duhet për turbulencat që parashikojnë 007-at e Zelenskit dhe ndoshta edhe për vendet që e këshilluan gjatë qëndrimit të saj në Bruksel.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje