.png)
Simone Inzagi lë Lacion për të kaluar tek Interi. Klubi zikaltër ka gjetur trajnerin për sezonin e ri, duke ia marrë Lacios në “kthesën e fundit”, me një parakalim surprizë. Një manovër e finalizuar me sukses në një ditë të çmendur mes Romës dhe Milanos.
Inzagi prishi marrëdhëniet me Lacion një ditë pasi gjithcka u duk e mbyllur për rinovimin deri në 2024-ën. Darka me presidentin Lotito la përshtypjen se situata ishte mjaft e qetë, por nuk ishte kështu. Ish-sulmuesi u afrua me Interin dhe orët e fundit arriti një akord me drejtuesit e tij, të cilët nuk hoqën dorë dhe ia arritën qëllimit. Prokuratori i Inzagit, Tulio Tinti, shkoi në selinë zikaltër për të përcaktuar edhe detajet e fundit.
Akordi mes palëve është për një kontratë dyvjeçare, me një rrogë prej 4 milionë eurosh për trajnerin, plus bonuset, gati dyfishi i shifrës që Inzagi do të përfitonte nga rinovimi me Lacion. Pavarësisht qëndrimit pozitiv në kampin e Lacios, trajneri asnjëherë nuk e materializoi firmën e zgjatjes së kontratës. Ai së fundi i kërkoi kohë Lotitos dhe Interi përfitoi për të bërë goditjen. Interi ishte në kërkim të trajnerit pas largimit të Kontes dhe Inzagi e ka çdo gjë gati, pais përdor të njëjtën skemë, 3-5-2.
Igli Tare dhe Lotiro ndërkohë duhet të gjejnë një trajner të ri. Presidenti i Lacios u shpreh i zhgënjyer nga largimi i Simone Inzagit: “Jam i zhgënjyer, firma ime ishte gati gjithmonë”. Kandidati kryesor për të marrë drejtimin e Lacios është Sinisha Mihajloviç, ish-lojtar i këtij ekipi që sezonin e fundit ka drejtuar Bolonjën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje