.png)
Titulli kampion në Itali është një garë treshe mes Interit, Juventusit dhe Lacios. Dy të parët kryesojnë pas 23 javësh me pikë të barabarta, nga 54, kurse Lacio ka 1 pikë më pak. Të dielën Lacio pret Interin në “Olimpico” dhe ka mundësinë më të mirë ta kalojë, nëse e mund.
Sigurisht, shtypi sportiv në Itali po i kushton rëndësi kësaj sfide që mund të jetë përcaktuese në garën e titullit. Në një prej artikujve të “Gazzetta Dello Sport” evidentohet portieri Tomas Strakosha si një nga pikat më të forta të kësaj skuadre në luftën për titull. Portieri i Kombëtares shqiptare dhe prapavija e skuadrës së Inzagit në tërësi është më e mira e kampionatit, bashkë me atë të Interit.
Të dielën përballen dy mbrojtjet më të forta të Serisë A, me nga 20 gola të pësuar në 23 javë kampionat. “Interi është i paralajmëruar, me Strakoshën Lacio është e blinduar prapa”. Ky është titulli i artikullit të prestigjiozes italiane. Në sfidën e kësaj jave do të mungojë dueli mes Strakoshës dhe Handanoviçit, pasi slloveni i Interit është i dëmtuar dhe portën zikaltër do ta mbrojë Padeli.
Strakosha gëzon një formë shumë të mirë aktualisht. Ai e kaloi momentin e vështirë të gafës në derbin me Romën dhe pritet që ndaj Interit të tregojë vlerat e veta më të mira. Një fitore e mundshme e Lacios, do të thotë 2 pikë avantazh nga Interi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje