.png)
Në Zyrih, në mbrëmjen gala të “The Best Fifa Awards”, futbollisti më i mirë i vitit 2020 është shpallur Robert Levandovski. Polaku i Bajernit ka mundur Kristiano Ronaldon dhe Lionel Mesin, dy finalistët e tjerë. Futbollistja më e mirë është shpallur Lusi Bronz, portieri më i mirë Manuel Nojer dhe trajneri më i mirë Jurgen Klop.
“Diego Armando Maradona dhe Paolo Rosi janë dy legjenda të futbolit. Ata kanë bërë që shumë njerëz të dashurohen me futbollin. Një përqafim të ngrohtë për familjet e tyre”. Janë fjalët e Xhani Infantinos, presidentit të FIFA-s, i cili ka dashur që gjatë ceremonisë të kujtojë dy ish-futbollistët e mëdhenj të ndarë nga jeta. “2020-a ishte një vit shumë i vështirë, shpresoj që 2021-shi të jetë më i mirë. Shëndeti është para së gjithash, edhe para futbollit. Futbolli rinisi dhe riktheu buzëqeshjen te miliona njerëz”, – shtoi Infantino.
Trajneri më i mirë për 2020-ën është Jurgen Klop dhe ky është suksesi i dytë radhazi për gjermanin. Ai mundi patriotin e tij Hans-Dieter Flik të Bajernit argjentinasin Marselo Bielsa të Lidsit. Edhe portieri më i mirë i vitit është gjerman, Manuel Nojer i Bajernit, fitues i Ligës së Kampionëve, Bundesligës, Kupës së Gjermanisë dhe Superkupës së Gjermanisë. Ai la pas Alison Beker të Liverpulit dhe Jan Oblak të Atletiko Madridit.
“Çmimin Puskas” për golin më të bukur e ka marrë koreanojugori Son i Totenhemit. Goli i tij në Totenhem-Bërnli u shpall më i bukuri. Në fund, formacioni më i mirë i vitit 2020 u shpall ky: Alison; Aleksndër-Arnold, van Dijk, Serxho Ramos, Davis; Kimmish, De Brujne, Tiago Alkantara; Mesi, Levandovski, Ronaldo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje