.png)
Gazeta Si – Brazili ka zgjedhur presidentin e ri: Lula mposht Bolsonaron dhe rimerr vendin për herë të tretë 11 vjet pas mandatit të tij të fundit.
Në votimin për zgjedhjet presidenciale, me 100% të votave të numëruara, kreu i Partisë së Punës mori 50,88% kundrejt 49,12% të kandidatit të djathtë të Partisë Liberale.
Rezultati erdhi në fund të një gare emocionuese kokë më kokë, e cila në fillim e kishte parë Bolsonaron në krye dhe në fund të një fushate të zjarrtë elektorale. “I vetmi fitues është populli brazilian”, tha Lula.
Qendrat e votimit u mbyllën në orën 17:00 me orën lokale, në orën 21:00 në Europë.
Më shumë se 120 milionë brazilianë votuan, me rreth 20% që abstenuan në raundin e parë.
Operacioni i numërimit u krye në mënyrë elektronike, për këtë arsye rezultati përfundimtar u bë i disponueshëm pak orë pas mbylljes së qendrave të votimit. Bolsonaro bëhet kështu presidenti i parë që dështon në përpjekjen e tij për rizgjedhje.
“Në një nga zgjedhjet më të rëndësishme në Brazil, ka vetëm një fitues: populli brazilian”, komentoi Lula.
“Nuk është një fitore e imja apo e partisë sime, por e një lëvizjeje të jashtëzakonshme demokratike. Shumica e njerëzve e kanë bërë të qartë se duan më shumë demokraci dhe jo më pak. Ata duan më shumë liri, më shumë barazi dhe më shumë vëllazëri”. shtoi ish-sindikalisti, i cili e filloi fjalën e tij “duke falënderuar Zotin që më lejoi të dal nga ku dola dhe të arrij këtu ku jam”.
“Nga 1 janari do të qeveris për të gjithë brazilianët dhe jo vetëm për ata që më votuan”, vazhdoi presidenti i ri. “Është koha për të ribashkuar familjen. Askush nuk është i interesuar të jetojë në një vend që është vazhdimisht në luftë. Është koha për të lënë armët. Ata u përpoqën të më varrosnin të gjallë, por unë pata një proces ringjalljeje në politikën braziliane, – tha Lula. – Jam këtu për të qeverisur vendin në një kohë shumë të vështirë, por do të mund të gjejmë përgjigjet”.
Lula ka fituar pozitën e presidentit të Brazilit për herë të parë më 2002. Katër vjet më vonë, e ka fituar edhe mandatin e dytë.
Politikat e eksporteve me Kinën, dhe programet tjera të ndihmës, kanë ngjitur miliona brazilianë në klasë të mesme.
Ai është larguar nga pozita e presidentit me normë të mbështetjes prej mbi 80 për qind.
Madje ish-presidenti amerikan, Barack Obama, e pati konsideruar atë “politikanin më popullor në botë”.
Më vonë ai është dënuar për korrupsion dhe pastrim parash, çka i ka pamundësuar garën në zgjedhjet presidenciale të vitit 2018.
Ndërkohë, Gjykata Supreme ka vlerësuar ligjshmërinë e dënimeve të tij, të cilat përfundimisht i ka anuluar me arsyetimin se kryetari i trupit gjykues federal ka qenë i njëanshëm dhe ka bashkëpunuar me prokurorët.
Pas 580 ditëve në burg, da Silva është liruar. Për të, kjo fitore e re përbën kthim të fuqishëm.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje