.png)
Dritan Abazoviç përballet këtë të enjte me testin e vështirë në parlamentin malazez; mocionin e mosbesimit të dorëzuar nga partia e Milo Gjukanoviç, e njëjta parti që e votëbesoi në postin e Kryeministrit.
Arsyeja e mocionit është marrëveshja e nënshkruara nga Abazoviç me Kishën Ortodokse Serbe të Malit të Zi, që i siguron kishës pronat që malazezët thonë se i ka grabitur që nga periudha e Mbretërisë Serbo-Kroate.
Që të mbijetojë, Dritan Abazoviç i duhet që të sigurojë mbështetjen e të paktën 40 deputetëve në parlament. 36 prej tyre janë përfaqësues të socialdemokratëve, partia e Milo Gjukanoviç, të cilët kanë firmosur në bllok mocionin e mosbesimit ndaj Kryeministrit.
Partia e Gjukanoviç thotë se marrëveshja e nënshkruar nga Abazoviç dëmton interesat e malazezëve dhe zotohet se me ngritjen e Qeverisë së re do ta anulojë këtë marrëveshje.
Mocionin e kanë përshëndetur edhe parti të tjera më të vogla, që për nga numri i mandateve në parlament bashkë me socialdemokratët plotësojnë 41 vota, aq sa duhen për të rrëzuar Qeverinë e Abazoviç.
Ky i fundit pritet që të ketë mbështetjen e serbëve në Kuvend, ndërsa ka deklaruar se nëse qeveria i mbijeton mocionit, do të zgjerojë koalicionin qeveritar, në një përpjekje që nga socialdemokratët është cilësuar si lëvizje për të joshur partitë e vogla boshnjake e malazeze.
Veç marrëveshjes me Kishën Serbe, Milo Gjukanoviç ka kritikuar Kryeministri Abazoviç edhe për afrimin e Malit të Zi në nismën e Ballkanit të Hapur. Ai thotë se dy qëndrimet e ndjekura nga qeveria e Abazoviç për këto dy çështje bien ndesh me programin e saj, ku prioritet ka qenë lufta kundër korrupsionit dhe shteti i së drejtës për të avancuar me negociatat dhe anëtarësimin e vendit në Bashkimin Europian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje