.png)
Kanë kaluar 30 vjet nga finalja Gjermani-Argjentinë e Botërorit të 1990-ës, i zhvilluar në Itali. Ende diskutohet për atë penallti të kthyer në gol nga Andreas Brehme që u dha trofeun gjermanëve. Të gjithë lojtarët argjentinas atë ditë e kanë mohuar faullin e Roberto Sensinit ndaj Rudi Fëlerit, që arbitri Edgardo Kodesal, një meksikan me origjinë uruguaiane, e konsideroi penallti. E pranon që nuk ishte penallti edhe një nga ata që përfituan nga ai vendim i arbitrit, Lotar Mateus, duke folur për “La Nacion”.
“Isha në një pozicion shumë të mirë për ta parë atë rast. Pashë që kishte një kontakt, që për mua nuk ishte i mjaftueshëm për penallti. Në një ndeshje të tillë, nëse jepet një penallti, arbitri duhet të jetë i sigurt 100% se faulli është i qartë. Për mua nuk ishte një faull i tillë, por nuk besoj se Kodesal e ka bërë me qëllim. Ndoshta nga pozicioni i tij e ka parë ndryshe”, – ka deklaruar kapiteni i Gjermanisë në atë ndeshje, duke hapur kështu një plagë të vjetër të argjentinasve dhe veçanërisht të Maradonës.
“Topi i Artë 1990” ka shpjeguar edhe pse nuk e gjuajti ai penalltinë vendimtare për titullin e tretë botëror të Gjermanisë: “E gjuajti Brehme atë penallti, sepse unë vendosa të mos gjuaja. Kisha problem me njërën këpucë, ishte prishur. Për pjesën e dytë i ndërrova këpucët dhe nuk ndihesha i sigurt me këpucët e reja, prandaj dhe vendosa të mos gjuaja unë”, – sqaron Mateus.
Arbitri i finales së “Itali 1990”, Kodesal, u bë protagonist edhe për një rast penalltie të padhënë për Argjentinën. Argjentinasit kanë reklamuar një faull të Mateusit ndaj Gabriel Kalderon, u cili rreth një muaj më parë e ka kujtuar atë moment me një mesazh drejtuar arbitrit: “Tani i kërkoj Kodesal, me gjithë respektin, një gjë të vetme: të jetë i ndershëm dhe të paktën të pranojë se ka gabuar dhe i ka hequr Argjentinës mundësinë për të qenë kampione e botës në Itali”, – shkruante Kalderon.
Kurse Lotar Mateus ka preferuar ta kalojë këtë episod me një batutë. “Penallti ndaj Kalderonit? Kush, unë? Seriozisht e keni? Nuk mbaj mend gjë, vërtet. Por, nëse Argjentina nuk na sulmoi, si mund të fitonte një penallti pa vënë këmbët në zonën tonë?”
Burimi: Gazzetta dello Sport/ Përktheu: Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje