.png)
Që Nicolò Zaniolo ka diçka speciale, kjo është kuptuar që prej disa muajsh, ku talenti italian ka shënuar gola të rëndësishëm për Romën. Brilant edhe në nivelin e lojës. Por mbrëmjen e 12 shkurtit, në ndeshjen e parë eliminatore në Champions League kundër Portos, ylli i ri i Romës ka marrë skenën, duke shënuar dy golat e fitores dhe duke vendosur një rekord për futbollin italian në këtë kompeticion.
Ai ka treguar se është në gjurmët e Françesko Totit. 19-vjeçari është i destinuar të ketë një të ardhme të ndritur dhe Interi po e vajton që tani largimin e këtij xhevahiri. Pas ndeshjes që u mbyll 2-1, Zaniolo komentoi me buzëqeshje: “Një natë magjike, e paharruar për mua. Jam vërtet i lumtur, sepse realizova një nga ëndrrat e fëmijërisë. Ishte shumë e rëndësishme ta nisnim ndeshjen mirë, bëmë atë që na kërkoi trajneri, nuk lamë hapësira dhe goditëm në kundërsulm. Tani duhet të shkojmë në Portugali për të siguruar kalimin e turit”.
Zaniolo ka djegur një tjetër etapë të karrierës së tij me dygolëshin e shënuar në “Olimpico” ndaj Portos. Ai është lojtari më i ri italian që shënon një dopietë në një ndeshje të Championsit modern. Një rekord, që e bën edhe më të magjishme mbrëmjen e lojtarit të ri. “Këtë mbrëmje nuk do ta harroj kurrë. Të shënosh në “Olimpico” dhe të shkosh të festosh me ata tifozë, është një emocion unik, që nuk mund të shpjegohet me fjalë. Shpresoj të shënoj sa më shumë gola të tjerë poshtë tribunës së ultrasve tanë. Por tani le të mendojmë për ndeshjen e kthimit, sepse ai gol i pësuar mund të jetë i rrezikshëm”, – ka theksuar talenti i Romës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje