.png)
Magjia e Champions League ka vazhduar me dy sfidat e radhës të fazës së 1/8-ve, Liverpul-Bajern Mynih dhe Lion-Barcelona. Pa dyshim që e gjithë vëmendja ishte e përqendruar në “Anfield Road”, ku Liverpuli i Jurgen Klop përballej me Bajernin. Ndeshja ishte spektakolare, ashtu siç mund të mendohej, por nuk ka prodhuar gola. E njëjta gjë ka ndodhur edhe në sfidën e luajtur në Lion, që gjithashtu u mbyll 0-0. Edhe pse në fushë zbritën sulmuesit më të mirë në planet, Lionel Mesi, Robert Levandovski, Mohamed Salah, Roberto Firmino, Luis Suarez apo Sadio Mane, në këto dy ndeshje nuk u shënua asnjë gol.
Liverpuli nisej favorit ndaj Bajernit, duke qenë se luante në fushën e vet. Dhe rastet në fakt nuk kanë munguar, por Salah dhe Mane janë ndaluar nga portiere Manuel Nojer, në një formë shumë të mirë. Por edhe bavarezët patën rastet e tyre në këtë ndeshje. Trajneri Robert Kovaç preferoi të rinjtë Koman dhe Gnabri në krah të Levandovskit, kurse Riberi u aktivizua në fundin e ndeshjes. Ishte një ndeshje, ku priteshin gola, por ka ndodhur e kundërta. Kualifikimin për në çerekfinale e vendos ndeshja e kthimit në Mynih, ku Bajerni, edhe pse ka barazuar në fushë kundërshtare, duhet të jetë shumë i kujdesshëm, sepse edhe një barazim me gola do ta nxirrte jashtë loje.
Pa gola është mbyllur edhe ndeshja në Lion, ku Barcelona, pavarësisht disa rasteve për shënim, nuk ia ka dalë ta gjejë rrugën e rrjetës. Trajneri Valverde la në stol Koutinjon në këtë ndeshje, duke aktivizuar Dembele në treshen e sulmit, bashkë me Mesin dhe Suarezin. Braziliani u fut në fushë në pjesën e dytë, por sërish katalanasit nuk mund të shënonin dhe tani gjithçka vendoset në ndeshjen e kthimit, ku sigurisht Barcelona mbetet favorite absolute.
Ndeshjet e para të 1/8-ve mbyllen me ndeshjet e së mërkurës, Shalke 04-Mançester Siti dhe Atletiko Madrid-Juventus. Pritet që të paktën Kristiano Ronaldo ta gjejë golin në Champions.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje