.png)
Tirana meritoi shumë më shumë se ajo humbje dramatike ndaj Crvena Zvezdës në “Air Albania Stadium”. I gjithë opinioni futbolldashës, specialistë futbolli dhe vetë presidenti i FSHF-së, Armand Duka, përshëndetën përfaqësimin dinjitoz të kampionëve të Shqipërisë, të dënuar nga fati në atë 90-minutësh. Megjithatë, situata çdramatizohet nga fakti se Tirana do të vazhdojë të luajë në Kupat e Europës.
Bardheblutë, pas eliminimit nga Liga e Kampionëve, kanë të drejtë të kalojnë në turin e tretë eliminator të Ligës së Europës. Emrin e kundërshtarit Tirana do ta mësojë nga shorti që do të hidhet pas mbylljes së turit të dytë eliminator të Ligës së Europës. Në turin e tretë të këtij kompeticioni marrin pjesë 20 skuadra, 10 nga të cilat vijnë nga Liga e Kampionëve, ashtu si Tirana, kurse 10 të tjerat janë ato që do të kualifikohen nga turi i dytë. Sipas rregullores, Tirana duhet të ndeshet me një ekip kampion të një kampionati tjetër.
Shorti është parashikuar të hidhet më 1 shtator, kur bardheblutë shpresojnë të kenë pak fat për të “peshkuar” një skuadër sa më të lehtë. Nëse e kalon turin e tretë eliminator të Ligës së Europës, Tirana shkon në “Play-Off”, pra një hap larg fazës së grupeve. Për më tepër, çdo kalim turi mbush arkën e klubit, kështu që kampionët kanë shumë arsye për të ecur përpara. Me atë që treguan ndaj Crvena Zvezdës, i kanë të gjitha mundësitë për të bërë histori.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje