.png)
Presidenti Ilir Meta ka kthyer në Kuvend për rishqyrtim ligjin për sigurimin e detyrueshëm në sektorin e transportit. Duke dhënë arsyet e këtij dekreti, Meta thekson se ky draft nuk garanton cilësisht mbrojtjen e jetës së qytetarëve.
“Referuar kohës që ka marrë hartimi i këtij projektligji, por dhe debatit publik që ka shoqëruar këtë ligj me kaq rëndësi për përditshmërinë e jetës shoqërore në vend, duket krejtësisht e besueshme ideja se, ‘lobimi i kompanive siguruese’ ka rrëzuar mekanizmin e ri bonus-malus, që fillimisht ishte si një risi në draftin e ligjit të hartuar nga AM, ndërkohë që Ministria e Financave, Këshilli i Ministrave dhe Kuvendi i Shqipërisë, duket se nuk kanë mundur t’i rezistojnë presionit të kompanive të sigurimit”.
Sipas Metës, përmbushet kështu sërish një kërkesë jo objektive e kompanive të sigurimit.
“Referuar kohës së gjatë që ka marrë hartimi i këtij projektligji, historikut të ndryshimit të drafteve të projektligjit në raport me përmbajtjen e ligjit të miratuar, del po kaq qartë në dritë fakti se, lobimi kundër sistemit bonus-malus, ja ka arritur qëllimit”.
Për kreun e shtetit, edhe këtë herë, Kuvendi i Shqipërisë, ka treguar për të disatën herë se nuk përmbush kërkesat e shoqërisë shqiptare, “por përballë interesave të qytetarëve me ato të biznesit, tërhiqet dhe anon nga pakica, duke lënë sërish shtigje të hapura dhe kleçka ligjore që tregu i sigurimeve të mos rregullohet sipas orientimit dhe forcës shtrënguese të ligjit, por sipas dëshirës apo dakordësisë të kompanive të sigurimit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje