.png)
Presidenti Ilir Meta nuk u paraqit personalisht në seancën plenare të Gjykatës Kushtetuese, por ekipi i tij i juristëve prezantoi thelbin e pretendimeve që kundërshtojnë kërkesën dhe raportin e miratuar nga socialistët në Kuvendin e kaluar për shkarkimin e tij.
Seanca ka nisur me kërkesën e këshilltarit ligjor të Presidentit, që kërkoi heqjen dorë nga shqyrtimi i çështjes nga ana e Gjykatës Kushtetuese, duke iu referuar rastit të gjyqtares Fiona Papajorgji, të cilën e ka paditur në Kolegjin e Posaçëm të Apelimit për shkelje të rënda proceduriale dhe ligjore gjatë relatimit të çështjes së zgjedhjeve vendore të 30 qershorit 2019.
Këshilltari ligjor i Presidencës vuri në dukje edhe faktin që kryetares së Gjykatës Kushtetuese, Vitore Tusha i ka përfunduar mandati prej pesë vitesh tashmë.
Një tjetër pretendim i Presidencës lidhet me faktin që vendimi për t’u shkarkuar është marrë nga Kuvendi i kaluar, ndërsa Gjykata Kushtetuese po merr vendim në një kohë që përbërja e Kuvendit ka ndryshuar e rrjedhimisht, sipas Presidentit mund të ketë ndryshuar edhe vullneti politik për shkarkimin e tij.
Mes pretendimeve të Presidencës janë edhe afatet e punës së Komisionit Hetimor që u ngrit për shkarkimin e tij nga Kuvendi i kaluar. Sipas Presidencës, fryma e ligjit për ngritjen e komisioneve hetimore parlamentare ndalon punën e tyre katër muaj nga përfundimi i mandatit të Kuvendit. Ky afat përfundonte më 9 maj, ndërsa puna e Komisionit zgjati deri më 24 maj të vitit të kaluar.
Përfaqësuesja e Kuvendit, Klotilda Bushka kundërshtoi pretendimet e Presidencës dhe kërkoi që gjykata të vazhdojë me gjykimin e çështjes. Ajo hodhi poshtë pretendimet e Presidentit.
“Nuk gjykojmë që ka shkelje. Argumente për shkelje të procedurës nuk ekzistojnë dhe nuk e cenojnë gjykimin e çështjes”, tha Bushka.
Gjykata u tërhoq për të marrë vendim me kërkesat e Presidentit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje