.png)
Presidenti Ilir Meta doli para gazetarëve nga qyteti i Shkodrës për të përcjellë dy lajme. I pari lidhej me zgjedhjet e pjesshme vendore në gjashtë bashkitë e mbetura pa kryetarë, ku Meta ka dekretuar datën 6 mars për mbajtjen e këtij procesi.
Pasi u bëri thirrje qytetarëve që të ushtrojnë të drejtën e votës në këtë proces, Presidenti Meta ndau këndvështrimin e tij mbi rëndësinë e këtyre zgjedhjeve. Sipas Metës, megjithëse ato janë zgjedhje vendore dhe të pjesshme në vetëm gjashtë bashki, ato kanë një rëndësi të madhe për integrimin dhe negociatat.
“Është moment i rëndësishëm për të rindërtuar dhe rivendosur, për të rehabilituar institucionin e votës së lirë në vend. Vërtet nuk janë zgjedhje kombëtare, por përfshijnë disa bashki kryesore të vendit dhe shtrihen nga Thethi e deri në Lushnje. Aktorët të reflektojnë dhe t’i shërbejnë këtij procesi për të pasur një proces shembullor, edhe për rrugën e integrimit. Ky është një moment i rëndësishëm për të treguar një reflektim nga institucionet, partitë, media, shoqëria civile dhe nga të gjithë qytetarët”, tha Meta.
Në këtë dalje të shkurtër, Meta iu shmang replikave me Partinë Demokratike, që një ditë më parë përmes Gazment Bardhit e mori si provë të “Trekëndëshit të Bermudës” takimin në Presidencë me Taulant Ballën.
“Nuk dua të bëj replika, as serioze dhe as gazmore”, tha Presidenti, duke deklaruar se me shpalljen e këtyre zgjedhjeve të pjesshme vendore nuk po favorizonte asnjë forcë politike, por vetëm qytetarët e gjashtë bashkive.
“Që do të kenë mundësinë të zgjedhin midis disa kandidatëve, mundësi që nuk e kishin më 30 qershor. Tani po u jepet kjo mundësi”, u shpreh Meta.
Lajmi i dytë lidhej me pritshmëritë nga 1 shkurti, kur Gjykata Kushtetuese ka shtyrë vendimmarrjen për kërkesën e Kuvendit për shkarkimin e Presidentit. Ndryshe nga deklaratat e intervistat e tjera, ku këmbëngulte se në Kushtetuese nuk ka asnjë çështje ndaj tij, këtë herë Meta u shpreh optimist për një vendimmarrje në favor të tij nga ana e Kushtetueses.
“Për çfarë vendimi flisni?! Vendimi i Parlamentit të shkarkuar pas zgjedhjeve të 25 prillit me farsën për shkarkimin e Presidentit jashtë të gjithë afateve dhe logjikës kushtetuese, vetëm se ka bërë një intervistë televizive?! Kaq mjafton për të pasur një atmosferë tepër optimiste dhe pozitive. Ne këtu do të jemi. Në histori do të jetë 2 marsi”, deklaroi Meta.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje