.png)
Parlamenti i Maqedonisë se Veriut do të votojë të enjten për një mocion mosbesimi ndaj qeverisë së drejtuar nga socialdemokratët.
Votimi u caktua nga kryetari i parlamentit Talat Xhaferi të hënën.
Mocioni u propozua nga kreu i opozitës, Hristijan Mickoski i partisë së krahut të djathtë VMRO-DPMNE dhe është firmosur nga 61 deputetë aq sa e lejon edhe Kushtetuta
Mediat maqedonase kanë publikuar dokumentin zyrtar të firmave të partive: VMRO, Aleanca për Shqiptarët, Alternativa, Lëvizja Besa dhe “E Majta”.
Në dokument shihet se iniciativa është për ngritjen e çështjes së besimit të Qeverisë, ndërsa si arsye përmenden dështimet e saj, përcjell Telegrafi Maqedoni.
“5 vitet e fundit janë dëshmi se kjo qeveri qeveris me konflikte dhe na largon nga Bashkimi Evropian, vetëm me një qëllim, dhe ai është mbrojtja e krimit dhe mbrojtja e karrierave dhe privilegjeve politike që i gëzojnë në mënyrë të pamëshirshme funksionarët në pushtet”, thuhet në dokumentin e firmosur. Debati pritet të mbetet i hapur, sa kohë që një nga firmëtarët, deputeti i Alternativës Skender Rexhepi, është shprehur se nuk do ta përkrah këtë iniciativë, me argumentin se, “nuk dëshiron të jetë në një anë me deputetët e ‘Të Majtës’”.
Ndërsa nga ana tjetër, deputetët e OBRM-PDUKM-së dhe partive tjera të shumicës së re, thonë se interpelanca ndaj Qeverisë do të përkrahet edhe nga disa deputetë të LSDM-së dhe BDI-së
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje