.png)
Surpriza më e bukur e Superiores është pa dyshim Bylisi i ardhur nga Kategoria e Parë, që pas javës së 6-të është në krye të renditjes me 11 pikë, po aq sa ka edhe Teuta, por ballshiotët kanë golaverazh më të mirë. Vetëm Tirana mund ta kalojë Bylisin, nëse fiton në derbin me Tiranën, që zhvillohet nesër. Në ndeshjen me Flamurtarin, ballshiotët fituan thellë, 5-0, duke vërtetuar se barazimi në fushën e Partizanit dhe fitorja në Korçë me Skënderbeun nuk kanë qenë rastësi. Vlonjatët, nga ana tjetër, vazhdojnë të pësojnë një “thes” me gola dhe mbeten në fund të renditjes me vetëm 1 pikë. Rënia duket e pashmangshme.
Është kthyer te fitorja Vllaznia, që ka mundur thellë Skënderbeun, 4-0. Ndeshja u vendos nga dy penallti të kthyera në gol nga kapiteni Gilman Lika, më pas shkodranët shënuan edhe dy gola të tjerë në fund. Ishte fitorja e dytë për Vllazninë në këtë kampionat, një fitore që e ngjit disa shkallë në klasifikim. Luftëtarit i ka shpëtuar fitorja nga duart, pasi në ndeshjen me Laçin është ndëshkuar në kohën shtesë dhe ka marrë vetëm një pikë.
Një rezultat disi surprizë është humbja e Kukësit në Durrës, duke qenë se skuadra e trajnerit Duro vinte në momentin e saj më të mirë në këtë ndeshje. Kukësi mbeti me 10 vetë, pasi Et’hemi u ndëshkua me karton të kuq, ndërsa goli i vetëm i ndeshjes u shënua me penallti nga Kallaku. Pas ndeshjes, trajneri Shpëtim Duro ka kontestuar gjykimin. Durrsakët ndajnë kreun me Bylisin pas kësaj fitoreje, ndërsa Kukësi nuk mundi të përfitonte, pasi Tirana luan derbin nesër dhe mund të ndalet nga Partizani. Një garë e fortë për kreun në këto 6 javë të para të Superiores.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje