Në SHBA, armët e zjarrit vrasin më shumë se makinat

Gazeta Si – Pas tronditjes dhe dhimbjes torturuese, tani prindërit e tre fëmijëve të vrarë në bankat e shkollës së Covenant në Nashville të Tenesit (SHBA), duhet të zgjedhin veshjet e funeralit dhe arkivolet e vogla për fëmijët e tyre të shfarosur nga një vrasëse që hyri në shkollë me pushkë sulmi dhe një pistoletë.

Një tjetër masakër e fëmijëve në një vend ku motivet që çojnë në dhunë ndryshojnë, por një gjë i bashkon këto masakra: qasja e lehtë te armët e autorit. Rezultati është dramatik: asgjë nuk vret më shumë fëmijë amerikanë sesa armët, të shtënat janë shkaku kryesor i vdekjeve në mesin e nën-19-vjeçarëve në SHBA. Edhe para aksidenteve automobilistike. Dhe jo pikërisht nga tani.

Kanë kaluar më shumë se 10 vjet nga masakra në shkollën fillore Sandy Hook në Neëtoën, Connecticut: mendohej se indinjata për ata 20 nxënës të vrarë më në fund do ta bënte Amerikën të kufizonte aksesin ndaj armëve.

Megjithatë, situata ndër vite jo vetëm që nuk ka ndryshuar, por edhe është përkeqësuar. Që nga rasti në Sandy Hook, vdekjet e fëmijëve nga armët janë rritur me 62% në Shtetet e Bashkuara të Amerikës.

Në vitin 2012, plagët me armë zjarri vranë 2,694 fëmijë në SHBA, sipas të dhënave nga Qendrat për Kontrollin dhe Parandalimin e Sëmundjeve (CDC).

Ky numër u rrit në 4,368 në vitin 2020 (viti i fundit për të cilin disponohen të dhënat zyrtare të dhunës me armë), me një rritje midis 2019-ës dhe 2020-ës.

Të shtënat e së martës në Nashville, Tenesi, janë vetëm një nga më shumë se 130 të shtëna masive të ndodhura në SHBA këtë vit, 13 prej tyre në shkolla.

Në total që nga Sandy Hook, mbi 25,000 fëmijë kanë vdekur nga plagët me armë zjarri.

Shumica humbën jetën nga sulmi (64%), rreth një e treta nga vetëvrasja (30%) dhe pjesa tjetër nga pakujdesia, siç janë armët e ruajtura në shtëpitë e tyre.

Armët e zjarrit vrasin aq shumë fëmijë amerikanë, saqë ata i japin fund jetës së 5.3 fëmijëve për 100,000 banorë dhe gjithashtu tejkalojnë numrin e vdekjeve nga automjetet, të cilat janë 4,8 për 100,000 banorë.

Jo vetëm që asnjë vend tjetër i zhvilluar nuk mund të pretendojë armët si shkakun kryesor të vdekjes së fëmijëve, por shkalla e vdekjeve nga armët tek fëmijët është shumë më e lartë se në vendet e tjera me të ardhura të larta, të cilat të gjitha kanë ligje për kontrollin e armëve shumë më të ashpra se Shtetet e Bashkuara.

Në Kanada, e cila renditet e dyta, norma është 0.8 për 100,000 banorë; në Francë është 0.5. Mesatarisht, në vendet e krahasueshme, është 0.3 për 100,000 për banorë.

“Ka shumë mënyra për të gjykuar suksesin ose dështimin e një vendi – konsideron amerikani Esau McCaulley këtë të mërkurë në gazetën “Neë York Times”. – Mund të shihet ekonomia, forca e ushtrisë ose cilësia e arsimimit të tyre. Mund të shqyrtojmë forcën e urave tona ose butësinë e autostradave tona. Por, ç’ndodh nëse përdorim një standard tjetër? Ne duhet të gjykojmë një komb me një parametër të thjeshtë: numrin e prindërve të prekur dhe arkivolet e fëmijëve të vegjël”.