.png)
Shiriti i kapitenit të Napolit në ndeshjen e fundit me Bolonjën ishte në krahun e Elseid Hysajt. Kapiteni i Kombëtares për herë të parë ka qenë edhe kapiten i Napolit. Hysaj e nisi ndeshjen titullar në krahun e majtë të mbrojtjes dhe në mungesë të Insinjes, trajneri Gatuzo e gradoi edhe kapiten të skuadrës. Privilegj dhe përgjegjësi e madhe për futbollistin kuqezi.
Gjatë kohës që Hysaj ka qenë pjesë e Napolit, ka pasur shumë ulje-ngritje. Napoli i vendosi klauzolën e 50 milionë erurove për prishjen e kontratës, por asnjë klub tjetër nuk iu afrua kësaj shume për të pasur shërbimet e mbrojtësit shqiptar. Me kalimin e kohës, sidomos pas largimit të Sarrit, kreditet e Hysajt ranë dhe pak muaj më parë largimi i tij nga Napoli dukej i sigurt.
Edhe menaxheri i lojtarit, Xhufredi, ka konfirmuar disa herë se sezonin e ardhshëm Hysaj do të luajë për një skuadër tjetër, por trajneri Gatuzo duket se mendon ndryshe. Ai po i beson mbrojtësit shqiptar edhe në një rol që nuk është natyral për të, ndërsa shiriti i kapitenit ndaj Bolonjës është një shenjë e qartë se Gatuzo e vlerëson Hysajn dhe e ka në planet e tij. Asgjë nuk mund të merret për e sigurt, por zhvillimet e fundit tregojnë se kapiteni kuqezi ka bekimin e trajnerit Gatuzo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje