.png)
Gazeta Si – Raundi i tretë i bisedimeve të paqes midis Rusisë dhe Ukrainës ka përfunduar në Bjellorusi, sipas mediave shtetërore ruse.
Agjencia e lajmeve “Reuters”, raporton se një negociator ukrainas tha se “bisedimet nuk e përmirësuan ndjeshëm situatën”.
Megjithatë, ai shtoi se një përparim i vogël ishte bërë në marrëveshjen logjistike për evakuimin e civilëve, pasi gjashtë korridore humanitare u krijuan këtë mëngjes. Podolyak u shpreh se të dyja palët do të vazhdojnë bisedimet për një armëpushim.
Anëtarët e delegacionit ukrainas mbërritën në Bjellorusi rreth orës 15:30 për një raund të tretë negociatash me Rusinë, në mes pushtimit rus të Ukrainës.
Delegacioni rus mbërriti në qytetin bjellorus Brest për bisedime me negociatorët ukrainas për përfundimin e armiqësisë, njoftoi sot agjencia ruse e lajmeve RIA. Gazetarët nuk lejohen në zonën ku do të zhvillohen bisedimet dhe zona ruhet nga ushtria bjelloruse.
Javën e kaluar, të dy palët ranë dakord, gjatë bisedimeve, të krijojnë korridore humanitare për evakuimin e civilëve nga zonat e luftës.
Megjithatë, kjo nuk ka ndodhur deri më tani, me Moskën dhe Kievin që akuzojnë njëri-tjetrin për shkelje të armëpushimit. Këtë të hënë, Kievi refuzoi korridoret humanitare të propozuara nga Moska për në Rusi dhe Bjellorusi.
Nga ana tjetër, Rusia është e gatshme të ndalojë operacionet e luftës në Ukrainë “në moment”, nëse Kievi pranon kushtet e Moskës.
Kështu u shpreh zëdhënësi i Kremlinit, Dmitry Peskov, në një intervistë telefonike për agjencinë e lajmeve “Reuters”.
Rusia, shpjegon Peskov, i kërkon Ukrainës të ndalojë veprimet ushtarake, të përfshijë neutralitetin në Kushtetutën e saj, të njohë Krimenë si një territor rus dhe të njohë republikat separatiste të Donjckut dhe Luhanskut, si shtete të pavarura.
Rusia – specifikoi ai – “nuk po anekson Donjetckun dhe Luhanskun, por vetëm kërkon që dy republikat separatiste të njihen si shtete të pavarura nga Ukraina”. Zëdhënësi i Kremlinit, këmbëngul se Rusia nuk pretendon territor tjetër nga Ukraina.
Rusia pushtoi dhe aneksoi Krimenë në mars 2014 dhe disa javë më vonë nisi mbështetjen e saj ndaj separatistëve pro-rusë në rajonet lindore të Ukrainës, Donjeck dhe Luhansk.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje