.png)
Përfundimisht, FSHF nuk ka të drejtë vote në asamblenë e KOKSH-it, që zhvillohet të shtunën, më 17 prill. Po ashtu, edhe Artan Shyti, kandidati për president i propozuar prej saj, nuk mund të marrë pjesë në garë. Ky është vendimi i komisionit organizator të asamblesë dhe FSHF-ja ka reaguar menjëherë me një deklaratë shtypi, ku njofton bojkotin e saj dhe fton edhe federatat e tjera të bëjnë të njëjtën gjë.
Për momentin nuk është e qartë, nëse nga FSHF është plotësuar apo jo dokumentacioni i munguar për të marrë pjesë në asamblenë e KOKSH-it. Një ditë më parë, presidenti Armand Duka kërkoi shtyrjen e asamblesë me një shkresë zyrtare, por kjo gjë nuk u bë e mundur. Ditët e fundit ka pasur përplasje të forta për këtë çështje, ku FSHF-ja e ka konsideruar procesin të paligjshëm dhe me ndikim të fortë politik. Kandidatë për president tashmë mbeten deputeti Fidel Ylli, Martin Biba dhe Vojo Malo.
Deklarata për shtyp e FSHF-së
Federata Shqiptare e Futbollit u njoftua sot përmes një e-maili se nuk do këtë të drejtën e votës në Asamblenë Zgjedhore të Komitetit Olimpik Kombëtar Shqiptar, duke u cënuar kështu nga një e drejtë themelore e çdo organizate me anëtarësi. Me këtë njoftim na u bë gjithashtu e ditur se kandidati i propozuar prej komunitetit të futbollit nuk do këtë të drejtën të zgjidhet. Ashtu si FSHF-së, edhe federatave të tjera u është mohuar kjo e drejtë.
Në listën e gjatë të vendimeve kundër interesave të sportit, ky është patjetër më i rëndi në historinë e këtij komiteti që vetëm olimpik e kombëtar nuk është. Me bindjen se zgjedhja e një presidenti është problemi i fundit që KOKSH ka, FSHF ju përgjigj kërkesës për mendim të zv/presidentit dhe kandidatit për president Vojo Malo, duke propozuar shtyrjen e asamblesë zgjedhore të datës 17 pril,l me qëllim rregullimin e problemeve themelore të këtij institucioni që fillojnë dhe mbarojnë tek anëtarësia.
Duke pasur axhendë tjetër, nën shembullin e partive politike, nga (nuk)-dihet se kush u vendos ndryshe, duke u injoruar edhe një herë qoftë kushtet higjienike, qoftë masat kufizuese të vendosura për shkak COVID-19.
Për qetësinë e organizatorëve, FSHF nuk do marrë pjesë në këtë asamble dhe fton secilën federatë që ka sadopak ndërgjegje për çka po ndodh ta bojkotojë atë për shkak të veprimeve të panumërta antiligjore, që vijojnë të ndodhin e që do të vazhdojnë të jenë objekt i hetimeve gjyqësore.
Dëshirojmë të nënvizojmë se ndryshe nga çfarë u intereson organizatorëve të kësaj pengmarrjeje dhe bashkëpunëtorëve të tyre, kritikat dhe sugjerimet e FSHF nuk janë përpjekje për t’i marrë udhëtimet jashtë shtetit ndokujt, por besim i sinqertë se përmes diskutimeve të hapura e në dobi të sportit kjo organizatë do mund vërtet të fillojë një kapitull të ri të olimpizmit shqiptar. Por, kur asnjë përpjekje nuk kursehet për ta zbehur zërin e komunitetit më të madh të sportistëve në vend, kjo organizatë ka një problem serioz me të vërtetën dhe ka dështuar në përmbushjen detyrave për të cilat është themeluar.
FSHF nuk ka interes për të qenë pjesë e asnjë organizate, e cila nuk e dëshiron kontributin e saj aq më pak një organizate politike, ndaj do të diskutojë me anëtarët e vet nëse do vijojë të jetë pjesë e KOKSH.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje